لاہور(مانیٹرنگ ڈیسک)لامودی پاکستان نے پراپرٹی پورٹ فولیو کی منیجنگ کو آسان بنانے کیلئے نئی تخلیقاتی ایپ متعارف کرادی ہے ۔لامودی کی حقیقی ایپ مکانات کی تلاش میں سرگرم افراد کیلئے آسانی مہیا کرتی ہے ،تاہم یہ نئی ایپ خاص طور پر ایجنٹس اور فروخت کنندگان کیلئے ہے جو کہ مشکلات سے پاک طریقہ کار کو یقینی بناتی ہے ۔یہ ایپ رئیل اسٹیٹ پروفیشنلز کو محض ایک کلک کے ذریعے متعدد خدمات فراہم کرے گی اور رئیل اسٹیٹ پروفیشنلز ایک بٹن دبا کر نئی پراپرٹیز اپ لوڈ،انوینٹری منیجنگ،کلائنٹس سے براہ راست پیغامات کی وصولی سمیت جدید مسابقتی تجزیات سے بھی استفادہ کرسکیں گے۔یہ ایک ایسی ایپ ہے جس کی تیاری کیلئے لامودی کے انجینئرز نے بے پناہ محنت کی ہے اور ایک ایسی ایپ تیار کرنے میں کامیاب رہے جو کہ اس سے قبل رئیل اسٹیٹ کے شعبے میں نہیں دیکھی گئی ہے ۔رئیل اسٹیٹ کے شعبے میں شفافیت اور اعتماد کو کلیدی حیثیت حاصل ہے اور آپ کو کسی ایسے فرد سے پراپرٹی خریدنے کی ہر گز ضرورت نہیں ہے جس پر آپ اعتماد نہ کرتے ہوں،اس نئی ایپ کے مقاصد بھی بالکل یہی ہیں ،ایجنٹس اور فروخت کنندگان اس ایپ پر اپنی ذاتی معلومات،تصویر اور فون نمبر کے ساتھ دیگر تفصیلات کے ساتھ پروفائل بناسکتے ہیں جس کی مدد سے ایجنٹس اور فروخت کنندگان زیادہ پیشہ وارانہ انداز اور اعتماد کے ذریعے ایک دوسرے سے رابطہ کرکے ڈیل کرسکتے ہیں،رئیل اسٹیٹ سیکٹر میں فراڈ کا بڑھتا ہوا عنصر پریشان کن ہے اور کیا یہ ایپ اس رجحان کو ختم یا کم کرسکتی ہے،اس حوالے سے لامودی پاکستان کے منیجنگ ڈائریکٹر سعد ارشد کا کہنا ہے کہ ہم نے رئیل اسٹیٹ سیکٹر میں تحفظ اور اعتماد کی بڑھتی ہوئی طلب کے پیش نظر ہی یہ ایپ ڈیزائن کی ہے اور یہ نہ صرف خریداروں کیلئے آسانی مہیا کرتی ہے بلکہ ایجنٹس کے بھی روزمرہ کے کاموں میں مشکلات کو کم کرتی ہے ،رئیل اسٹیٹ سیکٹر میں نت نئی جدید ٹیکنالوجی متعارف کرائی جارہی ہیں،ورچوئل رئیلٹی آنے کو ہے اور وہ دن دور نہیں جب دبئی میں بیٹھے پاکستانی سرمایہ کار اپنے دفتر کے صوفے پر براجمان ہوکر لاہور میں با آسانی پراپرٹی کی خریداری کرسکیں گے۔

موضوعات:پاکستان