لندن(نیوز ڈیسک)آپ یقیناً اپنے اسمارٹ فونز یا کمپیوٹر پر متعدد ویب سائٹس دیکھتے ہوں گے مگر ایک لنک کو کبھی مت کھولیں خاص طور پر آئی فون یا ایپل کے میک آپریٹنگ سسٹم کے سفاری ویب براﺅزر پر تو بالکل نہیں۔ جی ہاں جی ہاں کریش سفاری ڈاٹ کام نامی ویب سائٹ کو ایپل کی ڈیوائسز پر کھولنا سفاری براﺅزر کو کریش کردیتا ہے اب چاہے وہ میک لیپ ٹاپ ہو، آئی فون یا آئی پیڈ وغیرہ اور انہیں پھر سے ری بوٹ کرنے کی ضرورت پڑسکتی ہے۔ اور ہاں اس ویب سائٹ سے اینڈرائیڈ ڈیوائسز اور ڈیسک ٹاپ کمپیوٹر پر بھی گوگل کروم متاثر ہوتا ہے تاہم اس پر سفاری جیسا کریش نہیں ہوتا مگر پھر بھی صارفین کو پریشان کرنے کے لیے کافی ہے۔ اس لنک کے پیچھے موجود کوڈ میں کوئی جاسوس سافٹ ویئر تو بظاہر نہیں آیا اور اپنے براﺅزر یا ڈیوائس کو دوبارہ ری اسٹارٹ کرنے سے سب کچھ ٹھیک ہوجاتا ہے۔ تاہم ماہرین نے خدشے کا اظہار کرتے ہوئے کہا کہ کوئی اس کریش کو آپ کی ڈیوائس کی سیکیورٹی کو سمجھنے کے لیے استعمال کرسکتا ہے۔ یا کم از کم یو آر ایل کو اس لنک میں چھپا کر کسی قسم کا مذاق کرسکتا ہے۔ ایپل نے اس حوالے سے ابھی کوئی ردعمل ظاہر نہیں کیا تاہم اس دورانیے تک آپ اجنبی لوگوں کی جانب سے بھیجے جانے والے لنکس کو کلک کرنے سے گریز کریں تو زیادہ بہتر ہے۔