اسلام آباد (نیوز ڈ یسک)لاہور میں فضائی آلودگی کی صورتحال میں بہتری آنے لگی،

شہر کا ایئر کوالٹی انڈیکس 144 پر پہنچ گیا۔نجی ٹی وی چینل ’’ایکسپریس نیوز‘‘ کے مطابق لاہور اس وقت عالمی ایئر کوالٹی رینکنگ میں ساتویں نمبر پر ہے، جبکہ شہر کا ایئر کوالٹی انڈیکس 144 ریکارڈ کیا گیا ہے۔پنجاب کی سینئر وزیر مریم اورنگزیب نے بتایا کہ وزیراعلیٰ کی ہدایات پر لاہور کے زیادہ اے کیو آئی والے علاقوں میں اسموگ گنز کے ذریعے کارروائیاں مسلسل جاری ہیں۔ اس کے علاوہ محکمہ تحفظ ماحولیات (EPA) کی فیلڈ ٹیمیں بھی مختلف علاقوں میں نگرانی اور اقدامات میں مصروف ہیں۔انہوں نے کہا کہ لاہور کی اہم شاہراہوں پر پانی کے چھڑکاؤ کا عمل بھی جاری رکھا گیا ہے، جبکہ فضائی آلودگی پر قابو پانے کے لیے ہنگامی نوعیت کے اقدامات پر عملدرآمد کیا جا رہا ہے۔مریم اورنگزیب کے مطابق وزیراعلیٰ نے اسموگ کے معاملے پر زیرو ٹالرنس پالیسی اختیار کر رکھی ہے اور فیلڈ میں صورتحال کی مؤثر نگرانی کے ساتھ ضرورت کے مطابق فوری کارروائیاں کی جارہی ہیں۔سینئر وزیر نے دعویٰ کیا کہ اسموگ گنز کے استعمال، سڑکوں پر پانی کے چھڑکاؤ اور دیگر ماحولیاتی اقدامات کے نتیجے میں لاہور کے اے کیو آئی میں بہتری کا رجحان دیکھنے میں آیا ہے۔

انہوں نے مزید بتایا کہ شام 7 بجے ہوا کی رفتار 8 کلومیٹر فی گھنٹہ رہنے کی توقع ہے، جس کے باعث ایئر کوالٹی انڈیکس میں مزید بہتری آنے کا امکان ہے۔ ان کا کہنا تھا کہ ماحولیاتی تحفظ کے لیے شہریوں اور کسانوں کا تعاون بھی انتہائی اہم ہے۔