اسلام آباد (نیوز ڈیسک) تحریک انصاف کے 27 ستمبر کو ہونے والے لانگ مارچ کے حوالے سے مجوزہ حکمت عملی سامنے آگئی ہے، جس میں احتجاج کو چند دنوں تک محدود رکھنے کے بجائے کئی ہفتوں تک جاری رکھنے کی تجویز زیر غور ہے۔

ذرائع کے مطابق مارچ میں گاڑیوں اور موٹرسائیکلوں کے علاوہ پیدل قافلے بھی شریک ہوں گے۔ مجوزہ پلان کے تحت ملک کے مختلف علاقوں سے اسلام آباد آنے والے قافلوں کو فوری طور پر شہر میں داخل کرنے کے بجائے دارالحکومت سے باہر انتظار کروانے کی تجویز بھی دی گئی ہے۔

ذرائع کا کہنا ہے کہ لانگ مارچ کے دوران کل جماعتی کانفرنس کے انعقاد کی تجویز بھی زیر غور ہے، جبکہ احتجاج کے آئندہ لائحہ عمل سے متعلق حتمی فیصلہ وزیراعلیٰ خیبر پختونخوا سہیل آفریدی کریں گے۔

لانگ مارچ کے مطالبات میں اسیر سیاسی کارکنوں کی رہائی، مہنگائی میں کمی اور پیٹرولیم مصنوعات کی قیمتیں کم کرنا شامل ہیں۔ ذرائع کے مطابق تحریک انصاف کی جانب سے احتجاج کو مؤثر بنانے کے لیے دیگر مختلف آپشنز پر بھی غور جاری ہے۔

مجوزہ حکمت عملی کا باضابطہ اعلان کل کیے جانے کا امکان ہے۔