اسلام آباد (نیوز ڈیسک) لاہور اور اسلام آباد میں آج موسم گرم اور خشک رہنے کی پیشگوئی کی گئی ہے،

جبکہ کراچی میں گرمی کی شدت برقرار ہے اور درجہ حرارت 40 ڈگری سینٹی گریڈ تک پہنچنے کا امکان ہے۔ شہر قائد میں ہیٹ ویو جیسی صورتحال کے باعث گرمی کی شدت 47 ڈگری تک محسوس کی جاسکتی ہے۔

محکمہ موسمیات کے مطابق لاہور میں آج بارش کے امکانات نہیں، شہر میں موسم گرم اور خشک رہے گا۔ لاہور کا موجودہ درجہ حرارت 31 ڈگری سینٹی گریڈ ریکارڈ کیا گیا ہے، جبکہ زیادہ سے زیادہ پارہ 35 اور کم سے کم 25 ڈگری تک رہنے کی توقع ہے۔ شہر میں ہوا میں نمی کا تناسب 65 فیصد ریکارڈ ہوا جبکہ ہوائیں 3 کلومیٹر فی گھنٹہ کی رفتار سے چل رہی ہیں۔

وفاقی دارالحکومت اسلام آباد میں بھی موسم گرم اور خشک رہنے کی پیشگوئی کی گئی ہے۔ شہر کا موجودہ درجہ حرارت 23 ڈگری سینٹی گریڈ ریکارڈ کیا گیا، جبکہ دن کے دوران زیادہ سے زیادہ درجہ حرارت 34 ڈگری تک پہنچنے کا امکان ہے۔

محکمہ موسمیات کے مطابق اسلام آباد میں گزشتہ روز کے مقابلے میں درجہ حرارت ایک ڈگری کم ریکارڈ ہوا۔ شہر میں دن کے اوقات میں ہواؤں کی رفتار تقریباً 7 کلومیٹر فی گھنٹہ رہنے کی توقع ہے، جبکہ نمی کا تناسب 59 فیصد سے زائد ریکارڈ کیا گیا ہے۔

دوسری جانب کشمیر، بالائی خیبرپختونخوا اور گلگت بلتستان کے مختلف علاقوں میں مطلع جزوی طور پر ابر آلود رہنے کا امکان ہے، جبکہ بعض مقامات پر بارش بھی ہوسکتی ہے۔

کراچی میں شدید گرمی کی لہر برقرار ہے اور آج زیادہ سے زیادہ درجہ حرارت 40 ڈگری سینٹی گریڈ تک پہنچنے کی پیشگوئی کی گئی ہے۔ گزشتہ روز شہر میں زیادہ سے زیادہ درجہ حرارت 40.7 ڈگری سینٹی گریڈ ریکارڈ کیا گیا تھا۔

محکمہ موسمیات کے مطابق کراچی میں کل تک ہیٹ ویو جیسی کیفیت برقرار رہنے کا امکان ہے، جبکہ دوپہر کے اوقات میں تیز دھوپ کے باعث گرمی کی شدت 45 سے 47 ڈگری سینٹی گریڈ تک محسوس ہوسکتی ہے۔

شہر میں سمندری ہوائیں معطل ہونے کے باعث حبس کی کیفیت بھی برقرار ہے۔ آئندہ 24 گھنٹوں کے دوران کراچی کا موسم گرم اور مرطوب رہنے کی توقع ہے۔ موجودہ درجہ حرارت 28 ڈگری سینٹی گریڈ جبکہ محسوس ہونے والا درجہ حرارت 32 ڈگری ریکارڈ کیا گیا ہے، اور ہوا میں نمی کا تناسب 65 فیصد ہے۔