اسلام آباد (نیوز ڈیسک)کراچی کے علاقے محمود آباد میں ایک نجی ہسپتال میں ڈیلیوری کے دوران نومولود بچے کے گلے پر زخم آنے سے جاں بحق ہونے کا واقعہ پیش آیا۔ پولیس نے بچے کی لاش قانونی کارروائی کے لیے جناح ہسپتال منتقل کردی۔
اہلخانہ نے الزام عائد کیا ہے کہ بچے کی پیدائش کے دوران تیز دھار آلہ گردن پر لگنے سے اسے جان لیوا زخم آیا۔ نومولود کے تایا اشرف کے مطابق ان کے چھوٹے بھائی امین کے ہاں بچے کی پیدائش ہوئی تھی، جو پیشے کے اعتبار سے بس ڈرائیور اور پانچ بچوں کا والد ہے۔
اشرف نے بتایا کہ ہسپتال انتظامیہ نے ڈیلیوری کے تقریباً 30 منٹ بعد اہلخانہ کو اطلاع دی کہ بچہ مردہ پیدا ہوا ہے۔ تاہم جب انہوں نے بچے کو دیکھا تو اس کی گردن پر تیز دھار آلے سے لگنے کا نشان موجود تھا اور وہاں سے خون بھی بہہ رہا تھا۔
نومولود کے تایا کا کہنا تھا کہ وہ مالی طور پر کمزور ہیں اور کسی قسم کی قانونی کارروائی نہیں کرنا چاہتے، اسی وجہ سے پوسٹ مارٹم بھی نہیں کروانا چاہتے۔ ان کے مطابق وہ بچے کی میت گھر لے جا رہے ہیں اور مزید تکلیف نہیں دینا چاہتے۔
اشرف نے مطالبہ کیا کہ ایسے واقعات کی روک تھام کے لیے متعلقہ ہسپتالوں کے خلاف کارروائی کی جائے تاکہ مستقبل میں کسی اور خاندان کو اس طرح کے سانحے کا سامنا نہ کرنا پڑے۔
