اسلام آباد(نیوز ڈیسک )نادرا اور وفاقی بورڈ برائے ثانوی و اعلیٰ ثانوی تعلیم کے درمیان ایک معاہدہ طے پا گیا ہے، جس کا مقصد میٹرک اور انٹرمیڈیٹ کے امتحانات میں طلبہ کی رجسٹریشن کے عمل کو مزید مؤثر اور مربوط بنانا ہے۔
معاہدے کے تحت دونوں اداروں کے درمیان طلبہ کے ڈیٹا کے تبادلے کا باقاعدہ نظام قائم کیا جائے گا۔ اس نظام کے ذریعے نادرا اپنے ریکارڈ میں موجود طلبہ کی بنیادی معلومات، جن میں نام، والد کا نام اور تاریخ پیدائش سمیت دیگر ضروری تفصیلات شامل ہیں، وفاقی تعلیمی بورڈ کے ساتھ شیئر کرے گا۔اس اقدام سے طلبہ کی رجسٹریشن کے دوران معلومات کے اندراج میں ہونے والی غلطیوں اور مختلف ریکارڈز میں موجود تضادات کو کم کرنے میں مدد ملے گی۔ اس کے نتیجے میں تعلیمی اسناد کی درستگی اور قابلِ اعتماد ہونے کو بھی یقینی بنایا جاسکے گا، جبکہ متعلقہ انتظامی امور زیادہ بہتر انداز میں انجام دیے جا سکیں گے۔
معاہدے میں طلبہ کے لیے ڈیجیٹل والٹ متعارف کرانے کا منصوبہ بھی شامل ہے۔ اس سہولت کے ذریعے طلبہ اپنی تعلیمی اسناد کو محفوظ انداز میں ڈیجیٹل صورت میں حاصل اور ضرورت کے وقت استعمال کرسکیں گے۔نئے نظام سے طلبہ کے تعلیمی ریکارڈ کی حفاظت، رسائی اور تصدیق کے عمل کو جدید تقاضوں سے ہم آہنگ کرنے میں بھی مدد ملنے کی توقع ہے۔
