اسلام آباد (نیوز ڈٰیسک) گلگت بلتستان اسمبلی کے اسپیکر نذیر احمد ایڈووکیٹ نے پاکستان تحریک انصاف کو خیرباد کہہ کر پاکستان پیپلز پارٹی میں شمولیت اختیار کر لی ہے۔

ان کی شمولیت کے موقع پر نیئر بخاری، قمر زمان کائرہ اور صوبائی صدر امجد ایڈووکیٹ نے انہیں پارٹی مفلر پہنایا اور پارٹی میں آمد کا خیرمقدم کیا۔نذیر احمد ایڈووکیٹ جون 2023 سے بطور اسپیکر اپنی ذمہ داریاں انجام دے رہے تھے، تاہم اب انہوں نے پی ٹی آئی کی بنیادی رکنیت چھوڑ کر پیپلز پارٹی کا حصہ بننے کا فیصلہ کیا ہے۔دوسری جانب، گزشتہ سال اگست میں بھی پی ٹی آئی کے انفارمیشن سیکریٹری ساجد قریشی نے اپنے کئی ساتھیوں کے ساتھ پیپلز پارٹی میں شمولیت اختیار کی تھی۔ اس موقع پر انہوں نے کہا تھا کہ وہ دھرنوں، احتجاجی سیاست اور منفی بیانیے سے مایوس ہو چکے ہیں اور ایسی سیاسی جماعت کے ساتھ مزید نہیں رہ سکتے جو ان کے بقول ریاستی مفادات کے برخلاف ہو۔

ساجد قریشی نے پیپلز پارٹی کی قیادت پر اعتماد کا اظہار کرتے ہوئے کہا تھا کہ وہ مثبت اور قومی مفاد پر مبنی سیاست کو فروغ دینا چاہتے ہیں۔ گورنر پنجاب نے ان کی شمولیت کا خیرمقدم کرتے ہوئے یقین دہانی کرائی تھی کہ پارٹی میں ان کی خدمات کو سراہا جائے گا اور انہیں مناسب مقام دیا جائے گا۔