اسلام آباد (این این آئی)این ڈی ایم اے کے نیشنل ایمر جنسیز آپریشن سینٹر نے 31 جنوری سے4 فروری کے دوران متوقع موسمی صورتحال کے حوالے سے ایڈوائزری جا ری کر دی ہے جس کے مطابق پنجاب میں سرد اور خشک موسم متوقع جبکہ مری، گلیات اور پوٹھوہار میں 31 جنوری تا 3 فروری ہلکی بارش یا برفباری کا امکان ہے ۔ جاری اعلامیہ کے مطابق بلوچستان کے بیشتر علاقوں میں موسم اور سرد اور خشک تاہم شمالی و وسطی پہاڑی علاقوں میں 30 جنوری تا یکم فروری ہلکی بارش اور پہاڑی علاقوں میں برفباری کا امکان ہے ۔
ترجمان کے مطابق خیبر پختونخواہ کے میدانی علاقوں میں سرد اور خشک موسم موقع، بالائی و شمالی اضلاع میں 30 جنوری تا 3 فروری وقفے وقفے سے ہلکی بارش اور پہاڑی علاقوں میں برفباری کا امکان ہے ،سندھ میں سرد اور خشک موسم کے باعث دھند کا امکان ہے ،گلگت بلتستان اور آزاد کشمیر میں 30 جنوری تا 3 فروری موسم شدید سرد اور ابر آلود رہنے کا امکان ہے ، 4فروی تک بالائی علاقوں میں وقفے وقفے سے برفباری اور سردی کی شدت برقرار رہے گی۔
اعلامیہ کے مطابق این ڈی ایم اے کااین ای او سی تمام صورتحال اور ممکنہ خطرات کی پیشگی آگاہی اور متعلقہ اداروں تک ضروری معلومات کی فراہمی یقینی بنا رہا ہے۔ حکام نے کہاکہ موسم کے حوالے سے مستند معلومات، ممکنہ خطرات اور حفاظتی تدابیر کے حوالے سے راہنماء کے لیے پاک این ڈی ایم اے ڈیزاسٹر الرٹ موبائل ایپ کا استعمال کریں۔
