اسلام آباد (این این آئی)پاکستانی شہریوں کی بڑی تعداد غیر ملکی جیلوں میں قید ہونے کا انکشاف ہوا ہے۔قومی اسمبلی اجلاس میں جمع کرائے گئے تحریری جواب میں وزیر خارجہ اسحاق ڈار نے بتایا کہ 21ہزار 647پاکستانی شہری دنیا بھر کی مختلف جیلوں میں قید ہیں۔بتایا گیا ہے کہ بھارت میں 738 پاکستانی شہری قید ہیں۔ بھارت میں قید پاکستانی شہریوں کے حوالے سے کوئی معلومات نہیں دی جا رہی کہ انھیں کس جرم میں قید کیا گیا ہے۔تحریری جواب کے مطابق سعودی عرب میں 10ہزار 745پاکستانی شہری مختلف جرائم میں قید ہیں، سعودی عرب میں قید کچھ پاکستانی شہری سزا یافتہ ہیں اور بیشتر کے مقدمات زیر سماعت ہیں۔

وزیر خارجہ نے بتایا کہ متحدہ عرب امارات میں 5ہزار 297 پاکستانی شہری قید ہیں لیکن متحدہ عرب امارات میں قید پاکستانی شہریوں کے جرائم کے حوالے سے تفصیلات دستیاب نہیں۔چین میں اس وقت 652 اکستانی شہری قید ہیں۔ چین میں قید پاکستانی شہریوں میں زیادہ تر منشیات کی سمگلنگ، جعلی کرنسی کے استعمال، فراڈ یا غیر قانونی امیگریشن جیسے جرائم میں ملوث ہیں۔قطر میں 599، عمان میں 578، ملائیشیا میں 444، اٹلی میں 353، بحرین میں 218اور ترکیہ میں 190پاکستانی شہری قید ہیں۔امریکہ میں اس وقت 141پاکستانی شہری مختلف مقدمات میں قید ہیں جبکہ افغانستان میں 91پاکستانی شہری قید ہیں۔تحریری جواب میں بتایا گیا کہ بیرون ممالک قید 13ہزار 78پاکستانیوں کے مقدمات زیر سماعت ہیں جبکہ 8ہزار 569پاکستانی شہری سزا یافتہ ہیں۔