اسلام آباد(این این آئی) اسلام آباد انٹرنیشنل ایئرپورٹ پر غیر ملکی ایئر لائن کا طیارہ لینڈنگ کے دوران بڑے حادثے سے بال بال بچ گیا۔ پاکستان ایئرپورٹس اتھارٹی کے ذرائع کے مطابق ایئر ٹریفک کنٹرولر کے بروقت اقدام نے طیارے کو بند رن وے پر لینڈنگ کرنے سے روک دیا، سعودی ایئرلائن کی پرواز نمبر 728 جدہ سے اسلام آباد ایئرپورٹ پہنچی تھی جہاں رن وے 28 لیفٹ مرمت کیلئے بند ہے۔پاکستان ایئرپورٹس اتھارٹی نے رن وے 28 لیفٹ بند ہونے اور رن وے 28 رائٹ کھلے ہونے کا نوٹم بھی جاری کیا ہوا ہے، سعودی ایئرلائن کے پائلٹ نے لینڈنگ اپروچ 28 رائٹ کے بجائے 28 لیفٹ کے بند رن وے کی بنائی، کنٹرول ٹاور پر موجود ایئر ٹریفک کنٹرولر نے طیارے کے پائلٹ کو غلط رن وے پر ہونے کا بتایا۔
ذرائع نے بتایا کہ غیر ملکی ایئر لائن کا پائلٹ آخری وقت تک کہتا رہا کہ وہ ٹھیک رن وے پر ہے، ایئر ٹریفک کنٹرولر نے عین وقت پر پائلٹ کو لینڈنگ سے روک کر دوبارہ چکر لگانے کو کہا، دوسری کوشش میں سعودی ایئرلائن کے بوئنگ 777 طیارے نے درست رن وے پر لینڈ کیا۔جس وقت طیارے نے 28 لیفٹ پر لینڈنگ اپروچ بنائی اس وقت رن وے پر بڑی تعداد میں لوگ اور گاڑیاں موجود تھیں، غلط رن وے پر لینڈنگ ہو جاتی تو سنگین حادثہ پیش آسکتا تھا، سعودی ایئرلائن کے بوئنگ 777 طیارے میں سیکڑوں مسافر موجود تھے، پاکستان ایئر پورٹس اتھارٹی نے واقعے کا نوٹس لے لیا ہے۔
