لاہور (این این آئی)لاہور کے علاقے بند روڈ میں ایک دلخراش واقعہ پیش آیا جہاں باپ نے اپنی 15 سالہ سگی بیٹی کو گھر میں اکیلا پا کر زیادتی کا نشانہ بنایا۔ واقعہ کی رپورٹ ملتے ہی وزیراعلیٰ پنجاب مریم نواز شریف کی ہدایت پر پولیس نے فوری کارروائی کرتے ہوئے ملزم سید غفار علی شاہ کو گرفتار کر لیا۔ ڈی این اے سمیت تمام شواہد اکٹھے کر کے تفتیش جاری ہے۔ چیئرپرسن پنجاب ویمن پروٹیکشن اتھارٹی حنا پرویز بٹ وزیراعلیٰ پنجاب کی ہدایت پر متاثرہ بچی کے گھر پہنچیں، جہاں انہوں نے متاثرہ بچی اور والدہ سے ملاقات کی اور انہیں یقین دلایا کہ پنجاب ویمن پروٹیکشن اتھارٹی متاثرہ بچی کو مکمل قانونی، طبی اور نفسیاتی معاونت فراہم کرے گی۔

حنا پرویز بٹ نے کہا کہ باپ کا رشتہ سب سے مقدس ہوتا ہے، اور جو اس رشتے کو داغدار کرے، وہ کسی رعایت کے قابل نہیں۔ ایسے درندوں کو قانون کے مطابق عبرت کا نشان بنایا جائے گا تاکہ کوئی شخص آئندہ ایسی حرکت کا تصور بھی نہ کر سکے۔ انہوں نے مزید کہا کہ وزیراعلیٰ پنجاب مریم نواز شریف خواتین اور بچوں کے تحفظ کے لیے زیرو ٹالرنس پالیسی پر عمل پیرا ہیں۔ خواتین کے لیے محفوظ پنجاب صرف ایک نعرہ نہیں بلکہ ایک عزم ہے، اور پنجاب حکومت ہر مظلوم کے ساتھ کھڑی ہے جب تک انصاف مکمل نہ ہو جائے۔