اسلام آباد (نیوز ڈیسک) — سابق سینیٹر مشتاق احمد خان کی اسرائیلی حراست سے رہائی کے معاملے پر دفتر خارجہ نے تازہ پیشرفت سے آگاہ کر دیا ہے۔
ترجمان دفتر خارجہ کے مطابق، وزارتِ خارجہ اردن کے دارالحکومت عمّان میں موجود پاکستانی سفارت خانے کے ذریعے مشتاق احمد خان کی محفوظ واپسی کے لیے مسلسل اور بھرپور کوششیں کر رہی ہے۔
ترجمان نے امید ظاہر کی کہ برادر ملک اردن کے قیمتی تعاون سے یہ عمل آئندہ چند دنوں میں کامیابی سے مکمل ہو جائے گا۔
انہوں نے مزید کہا کہ پاکستان اردن کی حکومت کے مثالی تعاون اور حمایت پر تہہ دل سے شکر گزار ہے۔
یاد رہے کہ ایک روز قبل بھی دفتر خارجہ نے اسرائیلی افواج کے ہاتھوں گرفتار پاکستانی شہریوں، بشمول مشتاق احمد خان، کی رہائی سے متعلق بیان جاری کیا تھا۔
ترجمان نے بتایا تھا کہ ایک یورپی دوست ملک کے سفارتی ذرائع کے ذریعے یہ تصدیق ہو چکی ہے کہ سابق سینیٹر مشتاق احمد خان اسرائیلی حراست میں محفوظ اور خیریت سے موجود ہیں۔
مزید یہ بھی بتایا گیا کہ مقامی قانونی تقاضوں کے مطابق مشتاق احمد خان کو عدالت میں پیش کیا جائے گا، اور ملک بدری کے احکامات جاری ہوتے ہی ان کی واپسی فوری طور پر عمل میں لائی جائے گی۔
دفتر خارجہ کے مطابق، پاکستان اپنے بین الاقوامی اتحادیوں کے ساتھ قریبی رابطے میں ہے تاکہ اسرائیلی قید میں موجود تمام پاکستانیوں کی سلامتی اور جلد از جلد رہائی کو یقینی بنایا جا سکے۔
واضح رہے کہ جماعتِ اسلامی کے رہنما اور سابق سینیٹر مشتاق احمد خان غزہ کے محصور عوام کے لیے روانہ ہونے والے گلوبل صمود فلوٹیلا کے قافلے کا حصہ تھے۔ اسرائیلی فورسز نے بین الاقوامی پانیوں میں کارروائی کرتے ہوئے جہاز پر سوار متعدد رضاکاروں کو گرفتار کر لیا تھا۔
اگرچہ درجنوں غیر ملکی رضاکاروں کو رہا کیا جا چکا ہے، تاہم مشتاق احمد خان سمیت کئی دیگر افراد تاحال اسرائیلی تحویل میں موجود ہیں۔
