اسلام آباد (نیوز ڈیسک) لاہور کے علاقے گجومتہ میں دل دہلا دینے والا واقعہ پیش آیا جہاں پولیس کو اطلاع ملنے پر دو منزلہ مکان سے خون میں لت پت چار لاشیں ملیں جبکہ ایک کم عمر لڑکا زندہ بچ گیا، جس نے ہی یہ اطلاع اہلکاروں کو دی۔

ابتدائی معلومات کے مطابق کمرے کی دہلیز پر 21 سالہ نوجوان کی لاش پڑی تھی جسے کان کے قریب گولی ماری گئی تھی۔ دیگر تین لاشیں ایک کمرے کے اندر پلنگ پر موجود تھیں۔ ان میں لڑکے کی والدہ اور 8 سالہ گود لی ہوئی بہن شامل تھیں، دونوں کو سر میں گولیاں لگی تھیں۔ چوتھی لاش بڑی بہن کی تھی جس کے سینے میں گولیاں پیوست پائی گئیں۔پولیس کے مطابق واقعے کے وقت 14 سالہ علی زین، جو مقتولین کا بیٹا اور بھائی ہے، قریبی دوسرے گھر میں سو رہا تھا۔ علی نے بیان دیا کہ صبح سویرے ایک ہمسائے نے آ کر بتایا کہ ان کے گھر کے دروازے کھلے ہیں۔ جب وہ وہاں پہنچا تو اس نے اپنے اہلِ خانہ کو مردہ حالت میں پایا۔چونکہ واقعے کا کوئی براہِ راست عینی شاہد موجود نہیں تھا، پولیس نے شواہد اکٹھے کرنے کے لیے پنجاب فرانزک سائنس ایجنسی کو طلب کیا اور تفتیش کا آغاز کر دیا۔