فیصل آباد (این این آئی) یونیورسٹی آف ایگریکلچر فیصل آباد (یو اے ایف) نے کہاہے کہ چین نے پاکستانی ویٹرنری طلباء کیلئے سنکیانگ ایگریکلچرل یونیورسٹی (XJAU) میں مکمل فنڈڈ تعلیمی تحقیقاتی پروگرام کی پیشکش کی ہے۔ گوادر پرو کے مطابق یہ 15 روزہ پروگرام 10 سے 24 نومبر 2025 تک منعقد ہوگا، جس میں یو اے ایف اور کنفیوشس انسٹی ٹیوٹ سے وابستہ دیگر شراکتی جامعات کے ماسٹرز اور پی ایچ ڈی کے طلباء شرکت کریں گے۔
شرکاء کو رہائش، کھانے، ٹیوشن فیس اور مقامی ٹرانسپورٹ سمیت تمام سہولیات مفت فراہم کی جائیں گی۔ بہترین تحقیقی مقالہ جات کے مصنفین کو چین کا ریٹرن ہوائی ٹکٹ بھی دیا جائے گا۔ گوادر پرو کے مطابق اس پروگرام میں عملی تربیت، لیب سیشنز، فیلڈ وزٹ اور ازبکستان و چین کے طلباء کے ساتھ علمی تبادلے شامل ہیں، جو چین کی پاکستان کے ساتھ تعلیمی اور ثقافتی تعاون کو مزید مضبوط کرنے کی کوششوں کا حصہ ہیں۔ گوادر پرو کے مطابق اس پروگرام کے لیے وہی طلباء اہل ہوں گے جو ماسٹرز یا پی ایچ ڈی سطح پر ویٹرنری سائنسز میں زیرِ تعلیم ہوں اور یو اے ایف یا کسی کنفیوشس انسٹی ٹیوٹ سے منسلک ادارے کے ساتھ وابستہ ہوں۔
طلباء سے توقع کی جاتی ہے کہ وہ 11ویں XJAU پوسٹ گریجویٹ انٹرنیشنل اکیڈمک فورم میں اپنے تحقیقی مقالے بھی پیش کریں گے۔ گوادر پرو کے مطابق یو اے ایف کے مطابق یہ پروگرام پاکـچین تعلقات کے تحت تعلیمی اشتراک کو فروغ دے گا اور پاکستانی طلباء کو بین الاقوامی سطح پر تحقیق کے مواقع فراہم کرے گا۔ گوادر پرو کے مطابق یاد رہے کہ 1962 میں قائم ہونے والی یو اے ایف کی فیکلٹی آف ویٹرنری سائنس اب تک ہزاروں گریجویٹس تیار کر چکی ہے، اور ویکسینز، تشخیصی آلات اور مویشیوں کی صحت سے متعلق جدتوں میں نمایاں کردار ادا کرتی آئی ہے۔ یہ فیکلٹی پورے ملک میں کسانوں کو مدد فراہم کرنے کے لیے ہسپتال اور آؤٹ ریچ کلینکس بھی چلاتی ہے۔
