اسلام آباد (نیوز ڈیسک) لاہور کے جنرل اسپتال کے نرسری وارڈ سے یکم ستمبر کو اغوا کیے جانے والے نومولود کو پولیس نے تین روز بعد بازیاب کرا لیا۔ سی سی ٹی وی فوٹیج کی مدد سے دو مشکوک خواتین کی نشاندہی ہوئی، جس پر محکمہ صحت نے وارڈ کے عملے کو معطل کر دیا تھا۔پولیس کی جانب سے فوری کارروائی کرتے ہوئے بچے کی تلاش شروع کی گئی اور آخرکار نومولود کماہاں گاؤں سے برآمد ہوا۔ ملزمہ، جو بے اولاد تھی، نے طلاق کے خدشے کے باعث بچے کو اغوا کیا تھا۔

ایس پی انویسٹی گیشن ماڈل ٹاؤن ڈاکٹر ایاز حسین نے ایم ایس اسپتال کے ہمراہ پریس کانفرنس میں بتایا کہ سی سی ٹی وی فوٹیج کی مدد سے گاؤں تک رسائی حاصل کی گئی، وہاں گھر گھر تلاشی لی گئی اور بچے کو ایک صندوق میں چھپایا گیا پایا۔والدین نے بچے کی بازیابی پر خوشی کا اظہار کرتے ہوئے پولیس کا شکریہ ادا کیا۔ بچے کے والد افضال احمد نے بتایا کہ وہ 10 سال سے اولاد کے منتظر تھے، اغوا کے بعد تین دن نیند نہ آ سکی، مگر اب اللہ کا شکر ہے۔ڈاکٹرز کے مطابق بچہ صحت مند ہے تاہم اسے مزید دو دن اسپتال میں زیر نگرانی رکھا جائے گا۔