اسلام آباد (نیوز ڈیسک ) پنجاب کے شہریوں کو یکم سے 3 ستمبر کے دوران شدید موسلادھار بارشوں کیلئے تیار رہنے کی ہدایت کی گئی ہے۔ نیشنل ڈیزاسٹر مینجمنٹ اتھارٹی (این ڈی ایم اے) نے خبردار کیا ہے کہ ان بارشوں سے بالخصوص سیلاب زدہ علاقوں میں پانی کی سطح میں مزید اضافہ ہو سکتا ہے۔این ڈی ایم اے کے مطابق شمال مشرقی، وسطی اور جنوبی پنجاب کے کئی اضلاع میں سیلابی صورتحال پیدا ہونے کا امکان ہے۔ متاثرہ اضلاع میں مری، راولپنڈی، جہلم، اٹک، منڈی بہاوالدین، گجرات، گوجرانوالہ اور حافظ آباد شامل ہیں، جبکہ لاہور، سیالکوٹ، نارووال، شیخوپورہ، فیصل آباد، سرگودھا، چنیوٹ، بھکر، لیہ اور میانوالی میں بھی بارش کے باعث نشیبی علاقے زیر آب آ سکتے ہیں۔مزید برآں، ڈیرہ غازی خان، ساہیوال، ملتان، بہاولنگر، بہاولپور اور رحیم یار خان میں بھی شدید بارشوں اور ممکنہ سیلاب کے خدشات ظاہر کیے گئے ہیں۔

اتھارٹی نے مرالہ ہیڈ ورکس سمیت دریاؤں کے قریب بسنے والے افراد کو خصوصی احتیاط برتنے کی ہدایت کی ہے، جبکہ ندی نالوں کے قریب رہنے والوں کو غیر ضروری سفر سے گریز کرنے کا مشورہ دیا گیا ہے۔عوام اور متعلقہ اداروں کو کہا گیا ہے کہ وہ حفاظتی اقدامات مکمل رکھیں، خطرے والے علاقوں سے دور رہیں اور نشیبی مقامات پر نکاسی آب کیلئے مشینری اور پمپس تیار رکھیں۔دوسری جانب، گلگت بلتستان کے ضلع غذر میں برفانی گلیشیئر کے تیز پگھلنے کا خطرہ بڑھ گیا ہے، یاسین ویلی کے ڈارکوٹ سٹیشن پر درجہ حرارت 35 ڈگری سینٹی گریڈ ریکارڈ کیا گیا ہے جس سے برفانی جھیلوں کے پھٹنے، نالوں میں طغیانی اور نشیبی علاقوں کے متاثر ہونے کا امکان ہے۔