اسلام آباد (نیوز ڈیسک)پاکستانی طلبہ کے لیے خوشخبری ہے کہ اب وہ اپنی تعلیمی اسناد کی تصدیق صرف 24 گھنٹوں میں آن لائن کروا سکیں گے۔وفاقی وزیر تعلیم ڈاکٹر خالد مقبول صدیقی نے کسٹمر کیئر ڈیسک (CCD) پورٹل کا افتتاح کر دیا۔ اس پورٹل کا مقصد طلبہ کو ان کی اسناد کی فوری اور شفاف تصدیق کے ساتھ دیگر تعلیمی خدمات فراہم کرنا ہے۔ وزیر تعلیم کے مطابق یہ اقدام بیوروکریٹک رکاوٹوں کو کم کرتے ہوئے تعلیمی نظام کو ڈیجیٹلائز کرنے کی جانب اہم پیشرفت ہے۔یہ نیا نظام انٹر بورڈ کمیٹی آف چیئرمینز (IBCC) کے تحت تیار کیا گیا ہے جس کے ذریعے ملک بھر کے طلبہ اپنی اسناد کی تصدیق آن لائن کسٹمر سپورٹ سسٹم کے ذریعے کر سکیں گے۔
ایگزیکٹو ڈائریکٹر غلام علی ملاح کے مطابق، اس پورٹل میں کیو آر کوڈ پر مبنی نظام متعارف کرایا گیا ہے جس کے ذریعے طلبہ اپنی اسناد کی تصدیق کے عمل کو خود بھی ٹریک کر سکیں گے۔انہوں نے بتایا کہ اس سسٹم کی چھ ماہ تک کامیاب آزمائش کے بعد اسے عوام کے لیے لانچ کیا گیا ہے۔ مزید کہا گیا کہ اس سہولت سے نہ صرف پاکستان بلکہ دنیا کے کسی بھی حصے میں موجود پاکستانی طلبہ اور ان کے والدین مستفید ہو سکیں گے۔ درخواست دینے کے بعد کسٹمر کیئر ڈیسک 24 گھنٹے کے اندر جواب فراہم کرے گا، جو ان لوگوں کے لیے خاص طور پر فائدہ مند ہے جو ذاتی طور پر نہیں آ سکتے۔غلام علی ملاح نے مزید کہا کہ اس پورٹل کے ذریعے طلبہ کسی بھی وقت اپنی شکایات یا درخواستیں بھی جمع کرا سکتے ہیں۔ سی سی ڈی کا مقصد پروسیسنگ ٹائم کم کر کے طلبہ اور آئی بی سی سی کے درمیان رابطے کو مزید مؤثر بنانا ہے۔
