کراچی(این این آئی)ایک حالیہ رپورٹ کے مطابق دنیاکی10 سب سے زیادہ بولی جانے والی زبانیں تقریبا آدھی دنیا کی آبادی کی نمائندگی کرتی ہیں،انگریزی، چینی، ہندی، ہسپانوی، اورفرانسیسی جیسی زبانیں بین الاقوامی سطح پر بھی اہم ذریعہ ابلاغ سمجھی جاتی ہیں،دنیابھرمیں تقریبا 7 ہزارزبانیں بولی جاتی ہیں،جن میں سے صرف چند سوزبانیں ہی عالمی سطح پر رابطے کیلئے استعمال ہوتی ہیں۔انسائیکلوپیڈیا برٹینیکا کے مطابق انگریزی کو دنیا میں رابطے کی سب سے بڑی زبان تصور کیا جاتا ہے۔ جس کے غیرمقامی بولنے والوں کی تعداد مقامی بولنے والوں سے تقریبا 2.5 گنا زیادہ ہے۔
انگریزی کے مقامی بولنے والوں کی تعدادتقریبا 40 کروڑ ہے۔دنیا بھر میں ایک ارب سے زائد افراد اسے دوسری زبان کے طور پر استعمال کرتے ہیں۔چینی زبان، جو دوسری سب سے زیادہ بولی جانے والی زبان ہے۔ تاہم چین سے باہر چینی بولنے والوں کی تعداد نسبتا کم ہے۔اس زبان کی خاص بات اس کا منفرد طرزِ تحریر، لہجے اور قدیم ثقافتی ورثہ ہے۔ جو اسے سیکھنے والوں کے لیے ایک دلچسپ تجربہ بناتا ہے۔تیسری زبان ہندی ہے جو بھارت کی ایک سرکاری زبان ہے اور جنوبی ایشیا میں ایک مضبوط مقام رکھتی ہے۔ہندی زیادہ تر شمالی بھارت اور پاکستان کے کچھ علاقوں میں بولی جاتی ہے۔
اسے دیوناگری رسم الخط میں لکھا جاتا ہے۔فرانسیسی زبان دنیا کی چوتھی بڑی زبان ہے۔غیر مقامی بولنے والوں کی بڑی تعداد رکھتی ہے۔یہ انڈو-یورپی زبانوں کے خاندان سے تعلق رکھتی ہے اور نرمی و شائستگی کی علامت سمجھی جاتی ہے۔عربی زبان عرب ممالک میں مشترکہ طور پر استعمال کی جاتی ہے۔ یہ زبان سرکاری دستاویزات، تقاریر اور ادب میں استعمال ہوتی ہے تاکہ زیادہ سے زیادہ افراد اس سے فائدہ اٹھا سکیں۔علاوہ ازیں اس کی دنیا کی تمام مسلمانوں کے لیے مذہبی اہمیت بھی ہے کیوں کہ قرآن مجید اسی زبان میں نازل ہوئی۔عالمی سطح پر سب سے زیادہ بولی جانے والی 10 زبانوں کی فہرست میں اردو بھی شامل ہے۔واضح رہے کہ اردو دنیا بھر میں 23 کروڑ سے زائد افراد کی زبان ہے۔ جو پاکستان کی قومی زبان ہونے کے ساتھ ساتھ بھارت میں بھی بولی جاتی ہے۔اردو اپنی ادبی روایت،شاعری، اور نثر کی خوبصورتی کے لیے دنیا بھر میں جانی جاتی ہے۔
