ڈی آئی خان (این این آئی) ڈیرہ اسماعیل خان میں 6سالہ بچے کے قتل میں ملوث سگی ماں اور سوتیلے باپ کو ملتان سے گرفتار کرلیاگیا۔ ذرائع کے مطابق پولیس کو دو روز پہلے سڑک سے بچے کی لاش ملی تھی جس کی ویڈیو بھی منظر عام پر آئی تھی۔

ذرائع کے مطابق ڈیرہ اسماعیل خان کے علاقے عیدگاہ کلاں سے دو روز قبل 6سالہ بچے ذیشان کی تشدد زدہ لاش برآمد ہوئی تھی ،پولیس کے مطابق بچے کو سگی ماں نے دوسرے شوہر کے ساتھ مل کر قتل کیا اور لاش سڑک کنارے پھینک کر فرار ہوگئے تھے۔ میڈیکل رپورٹ کے مطابق بچے کا منہ دبا کر سانس روکی گئی جس سے اس کی موت واقع ہوئی تھی، ویڈیو میں عبایہ میں ملبوس خاتون کو لاش سڑک کنارے رکھتے دیکھا جاسکتا ہے۔پولیس کے مطابق دونوں ملزمان کو ریمانڈ کیلئے عدالت میں پیش کیا جائے گا۔