اسلام آباد (نیوز ڈیسک)نوجوان کی محبت میں کراچی آنے والی امریکی خاتون نے وطن واپسی کے لیے شرط رکھ دی۔امریکی خاتون اونیجا اینڈریو رابنس نے کراچی میں سماجی کارکن رمضان چھیپا کے ہمراہ پریس کانفرنس کرتے ہوئے کہا کہ وہ اپنے شوہر کی تلاش میں ہیں اور جیسے ہی وہ مل جائیں گے، وہ ان کے ساتھ دبئی چلی جائیں گی۔

انہوں نے حکومت سے مطالبہ کیا کہ انہیں مالی امداد فراہم کی جائے اور ایک لاکھ روپے دیے جائیں۔دوسری جانب، شاہراہ فیصل نرسری کے قریب خاتون نے ایک ایمبولینس رکوا لی اور بعد میں رکشے میں سوار ہو گئیں۔ ان کا کہنا تھا کہ وہ تھانے نہیں جانا چاہتیں، جس کے بعد وہ سڑک کنارے بیٹھ گئیں۔رمضان چھیپا کا کہنا ہے کہ خاتون کا ذہنی توازن درست نہیں لگ رہا، اور وہ نوجوان لڑکے سے اپیل کرتے ہیں کہ وہ آگے آکر مسئلہ حل کرے۔

اس سے قبل، انہیں وطن واپس بھیجنے کی تمام کوششیں ناکام ہو چکی ہیں اور اب وہ ایک فلاحی ادارے میں مقیم ہیں۔ رمضان چھیپا کے مطابق، وہ پہلے ٹیپو سلطان تھانے میں تھیں لیکن طبیعت خراب ہونے کے باعث انہیں آرام کی ضرورت ہے، اس لیے ان کے قیام کا بندوبست کر دیا گیا ہے۔یاد رہے کہ یہ امریکی خاتون 19 سالہ نوجوان سے شادی کی خواہش لیے گزشتہ سال 11 اکتوبر سے کراچی میں مقیم ہیں اور امریکا واپس جانے سے انکار کر رہی ہیں۔