لاہور( این این آئی)امیر جماعت اسلامی حافظ نعیم الرحمن نے کہا ہے کہ اسلام آباد داخلے سے روکا گیا تو ہمارے پاس پلان بی اور سی موجود ہے،کسی سیاسی جماعت کے ساتھ نہیں عوام سے اتحاد کرلیا ہے اور انہی سے مل کر دھرنا دیں گے، اسلام آباد جلائوگھیرائویا گولی کیلئے نہیں اپنا حق لینے جا رہے ہیں۔میڈیا سے گفتگو کرتے ہوئے امیر جماعت اسلامی ین وزیراعظم شہبازشریف کو مخاطب کرتے ہوئے کہا کہ قوم کو ریلیف دیں اس سے پہلے کہ قوم بپھر جائے اور جانے کا راستہ بھی نہ ملے، دھرنے پر بیٹھیں گے اٹھنے کی صرف ایک شرط ہوگی کہ عوام کو ریلیف دیں۔
انہوںنے کہا کہ مولانا فضل الرحمن کہتے ہیں دوبارہ الیکشن کرائو تاکہ نئے الیکشن پر نئی ڈیل ہو، جب فارم 45 موجود ہے تو کیوں الیکشن کروائیں، فراڈ کے نتیجے میں مخصوص اور خیراتی سیٹوں کو کیسے قبول کریں،عوام کے حق کیلئے جو کچھ بھی کرنا پڑا کریں گے، حکومتی ہتھکنڈوں کے عادی ہیں، جماعت اسلامی کے پاس پلان بی اور سی بھی موجود ہے لیکن وہ دھرنے میں بیٹھ کر اعلان کریں گے۔حافظ نعیم الرحمن نے کہا کہ یہ ہمارا ملک ہے، فوج اور بیوروکریسی عوام سے ہوتے ہیں، ہمیں امپائر کی انگلی کا انتظار نہیں، راولپنڈی اور اسلام والے سب اداروں کو تعاون کرنا ہوگا۔انہوںنے کہا کہ یہ کہتے ہیں آئی ایم ایف راضی نہیں ہوا اب تو اور گیس، بجلی کی قیمتیں بڑھائیں گے، گیس و بجلی کی قیمت تو بڑھا دی اب یہ سلسلہ نہیں رکے گا، آٹے چینی دال پر بھی ٹیکس لگا کر وزیر اعظم کہتے ہیں مہنگائی کم ہوگئی ہے۔
