لندن(این این آئی)نوبیل انعام یافتہ ملالہ یوسفزئی نے فلسطینی طلبہ کیلئے اسکالر شپ کا اعلان کردیا۔ملالہ فنڈ کی شریک بانی ملالہ یوسفزئی نے آکسفورڈ پاکستان پروگرام کی تقریب میں خطاب کرتے ہوئے آکسفورڈ یونیورسٹی میں فلسطینی طلبہ کیلئے اسکالر شپ کا اعلان کیا۔ اپنے خطاب میں ملالہ یوسفزئی نے کہا کہ غزہ کے 80فیصد سے زیادہ اسکول اور تمام یونیورسٹیاں یا تو مکمل طور پر تباہ ہوچکی ہیں یا انہیں نقصان پہنچا ہے۔

ملالہ یوسفزئی نے کہاکہ غزہ کے تعلیمی نظام کی تعمیر نو کے لیے دیر پا جنگ بندی اور کئی سال تک سرمایہ کاری کرنے کی ضرورت ہے۔ ملالہ یوسفزئی نے کہاکہ یہ صرف اسکالر شپ نہیں ہے بلکہ فلسطینی عوام کے ساتھ یکجہتی کا ایک اشارہ ہے۔اسکالر شپ حاصل کرنے والے فلسطینی طلبہ اکتوبر 2024میں آکسفورڈ یونیورسٹی کے مارگریٹ ہال میں اپنی تعلیم کا آغاز کریں گے۔