کراچی(این این آئی)زمان ٹائون پولیس نے شہریوں سے کروڑوں روپے ہڑپ کرنے والے جعلی ونگ کمانڈر کو گرفتار کرلیاہے۔جعلی ونگ کمانڈر ذیشان کی گرفتاری سعدی ٹائون سے عمل میں لائی گئی ہے۔پولیس کے مطابق ملزم خود کو حساس ادارے کا ونگ کمانڈر ظاہر کر کے شہریوں سے کروڑوں روپے کا فراڈ کر چکا ہے۔گرفتار ملزم سے حساس ادارے کی یونیفارم اور جعلی آئی ڈی کارڈ بھی برآمد ہوا ہے جو امیر گھرانوں کی خواتین سے شادی کرکے کروڑوں روپے ہڑپ چکا ہے۔
گرفتار ملزم نے دوران تفتیش امیر گھرانوں کی تین لڑکیوں سے شادی کا اعتراف کیا ہے، امیر گھرانوں کی لڑکیوں سے شادی کے بعد کاروبار کے لیے کروڑوں روپے وصول کرنے کے علاوہ سرکاری ٹھیکے دلوانے کا جھانسہ دے کر شہریوں سے کروڑوں روپے ہڑپ چکا ہے۔پولیس نے گرفتار ملزم کے قبضے سے سرکاری ٹھیکے دلوانے کے جعلی دستاویزات بھی برآمد کرلی ہیں۔ پولیس گرفتار ملزم کے دیگر ساتھیوں کو تلاش کر رہی ہے۔
