اسلام آبا د (این این آئی) ایم کیوایم قیادت نے حساس اداروں کی رپورٹ پر ڈاکٹر موہن منجیانی سے استعفیٰ طلب کرلیا ہے۔تفصیلات کے مطابق ایم کیوایم پاکستان کی قیادت نے حساس اداروں کی رپورٹ پر ڈاکٹر موہن منجیانی سے استعفیٰ طلب کرلیا ہے جبکہ الیکشن کمیشن نے قومی اسمبلی کی مخصوص نشستوں پر موہن منجیانی کا نوٹیفکیشن معطل کرتے ہوئے کہا ہے کہ قومی اسمبلی میں غیرمسلموں کیلئے مخصوص نشستوں سے موہن منجیانی کا نوٹیفکیشن نامعلوم وجوہات کی بنا پر معطل کیا گیا جو تاحکم ثانی معطل رہے گا۔
ذرائع کے مطابق ڈاکٹر موہن کی بھارتی سفارتخانے میں سرگرمیاں دیکھی گئیں، ان کی پاکستان سے نیو دہلی میں کی گئی کئی کالز بھی ٹریس ہوئیں۔ذرائع کے مطابق موہن منجیانی کی جانب سے بھارتی خفیہ ایجنسی را کے سیکرٹری روی سنہا کو کالز کی گئیں،ان کے گھر سے حساس دستاویزات بھی برآمد ہوئی ہیں۔
