لاہور( این این آئی)لاہور ہائیکورٹ کے جسٹس ملک شہزاد احمد خان بطور چیف جسٹس لاہور ہائیکورٹ8مارچ کو حلف اٹھائیں گے۔لاہور ہائیکورٹ کے سینئر ترین جج جسٹس ملک شہزاد احمد خان8مارچ 2024کو لاہور ہائیکورٹ کے 52ویں چیف جسٹس کے عہدے کا حلف اٹھائیں گے ۔نجی ٹی وی کے مطابق چیف جسٹس پاکستان جسٹس قاضی فائز عیسی کی سربراہی میں جوڈیشل کمیشن کے اجلاس میں جسٹس ملک شہزاد احمد خان کا بطور چیف جسٹس لاہور ہائیکورٹ تقرر کرنے کی منظوری دیدی گئی۔جسٹس ملک شہزاد احمد خان 15مارچ 1963کو پنڈی گھیب ضلع اٹک میں پیدا ہوئے،انہوں نے گورڈن کالج راولپنڈی سے گریجویشن کیا،اس کے بعد 1989میں یونیورسٹی لا کالج، پنجاب یونیورسٹی، لاہور سے ایل ایل بی کی ڈگری حاصل کی اور 1990میں راولپنڈی میں قانون کی پریکٹس شروع کی، 1993میں ہائیکورٹ اور 2004میں سپریم کورٹ آف پاکستان کے وکیل بن گئے، اکیس سال بطور وکیل پریکٹس کی اور بڑی تعداد میں مقدمات لڑے۔

جسٹس ملک شہزاد احمد خان 2004میں ہائی کورٹ بار ایسوسی ایشن راولپنڈی کے سیکرٹری جنرل اور 2009میں ہائی کورٹ بار ایسوسی ایشن راولپنڈی کے صدر منتخب ہوئے،12مئی 2011کو لاہور ہائی کورٹ میں ایڈیشنل جج بنے اور 11مئی 2013کو کنفرم ہوئے۔جسٹس ملک شہزاد احمد خان بطور چیف جسٹس 15مارچ 2025کے عہدہ سے ریٹائرڈ ہوں گے اس طرح وہ 12 ماہ 6دن تک چیف جسٹس کے عہدے پر براجمان رہیں گے۔