میرپورخاص(این این آئی) میرپورخاص میں زہریلے کھانا کھانے سے 35باراتیوں کی حالت غیر ہوگئی، جنہیں ہسپتال منتقل کردیا گیا۔تفصیلات کے مطابق میرپورخاص کی تحصیل شجاع آباد کے علاقے میرواہ کے نواحی گائوں جھڑبی کے رہائشی ملک راجپوت برادری سے تعلق رکھنے والے افراد میرواہ بارات لے کرگئے اور واپس گائوں پہنچنے کے تھوڑی دیر کے بعد ہی 35باراتیوں کی حالت غیر ہوگئی جس پر تمام افراد کو سول ہسپتال منتقل کردیا گیا۔

مریضوں کی تعداد زیادہ ہونے کے باعث اولڈ سول ہسپتال اور ڈسٹرکٹ سول ہسپتال میں ایمرجنسی نافذ کرکے لائے جانے والے مریضوں کو طبی امداد فراہم کی گئی۔باراتیوں نے پولیس کو بیان ریکارڈ کرواتے ہوئے بتایا کہ قریبی عزیز کے گھر بارات لے کر گئے تھے، کھانے کے بعد آبائی علاقے پہنچتے ہی غیر ہونے لگی جن میں دو بچے بھی شامل ہیں۔ہسپتال انتظامیہ کے مطابق تمام افراد فوڈ پوائزنگ کا شکار ہیں جنہیں طبی امداد فراہم کرنے کیساتھ ہسپتال انتظامیہ کی نگرانی میں رکھا جارہا ہے۔