راولپنڈی(این این آئی)بانی پی ٹی آئی کی بہن علیمہ خان نے کہا ہے کہ ایک کمشنر نہیں بہت سے لوگوں نے ہمیں بتایا اندر نتائج کیسے تبدیل کیے گئے،لوگ منہ کھولنے سے ڈرتے ہیں انہیں خدشہ ہے ان کیساتھ کچھ نہ ہو جائے۔میڈیا سے گفتگو کرتے ہوئے علیمہ خان نے کہاکہ بانی پی ٹی آئی نے کہا کہ الیکشن ڈے پر تاریخی دھاندلی کی گئی، 8فروری کی رات کو مدر آف پوسٹ پول دھاندلی کی گئی۔

علیمہ خان نے کہاکہ انٹرنیٹ اور موبائل سگنل بند کیے گئے،ووٹر دربدر پولنگ اسٹیشنز پر پھرتے رہے،بانی پی ٹی آئی نے کہا کرمنل لوگوں کے سارے کیس ختم کردئیے گئے، پہلے پری پول دھاندلی کی گئی۔انہوں نے کہاکہ لوگ منہ کھولنے سے ڈرتے ہیں انہیں خدشہ ہے ان کے ساتھ کچھ نہ ہو جائے، کمشنر راولپنڈی نے جو کچھ کہا ثبوت کے بغیر کچھ نہیں کہا۔انہوںنے کہاکہ بانی پی ٹی آئی نے کہا ہے لوگوں کو ان کا مینڈیٹ واپس کیا جائے، پاکستان کا دنیا کے سامنے تماشا بن گیا ہے۔