اسلام آباد(این این آئی)پی ٹی آئی نے خیبر پختونخوا میں پاکستان تحریک انصاف پارلیمنٹیرین کے ساتھ مل کر حکومت بنانے کا فیصلہ کیا ہے۔ذرائع کے مطابق خیبرپختونخوا میں حکومت سازی کیلئے پاکستان تحریک انصاف اور پی ٹی آئی پارلیمنٹرین کے رہنمائوں کے درمیان مذاکرات بھی ہوئے۔ذرائع پی ٹی آئی نے بتایاکہ عمران خان نے پی ٹی آئی پارلیمنٹرین کے ساتھ اتحاد کی اجازت دے دی ہے۔ذرائع کے مطابق جماعت اسلامی کے انکار کے بعد پی ٹی آئی نے پرویز خٹک کے ساتھ آگے بڑھنے کا فیصلہ کیا۔
دوسری جانب پی ٹی آئی پارلیمنٹرین کے ترجمان نے کہا کہ بانی پی ٹی آئی نے ہمارے ساتھ حکومت بنانے کا فیصلہ کیا ہے۔پی ٹی آئی پی کے ترجمان نے کہا کہ ابھی تک پرویز خٹک سے رابطہ نہیں کیا گیا ہے، رابطہ ہوا تو دونوں پارٹیاں مل کر مشاورت کریں گی۔ترجمان نے کہا کہ مل کر حکومت بنانے پر کوئی اعتراض نہیں۔یاد رہے کہ 8فروری کو ہونے والے عام انتخابات میں پی ٹی آئی پی نے خیبرپختونخوا سے دو نشستوں پر کامیابی حاصل کی ہے۔خیال رہے کہ پاکستان تحریک انصاف نے وزیراعلیٰ کے پی کے لیے علی امین گنڈاپور اور اسپیکر پختونخوا اسمبلی کے لیے اسد قیصر کے بھائی عاقب اللہ کو نامزد کیا ہے۔
