لاہور(این این آئی)آزاد جیتنے والے تین مزید ارکان اسمبلی پاکستان مسلم لیگ (ن)میں شامل ہو گئے ۔تفصیلات کے مطابق خانیوال سے رضا حیات ہراج پینل نے پاکستان مسلم لیگ (ن)صدر شہباز شریف سے ملاقات کی ۔رضا حیات ہراج قومی اسمبلی کے حلقہ این اے144خانیوال سے کامیاب ہوئے ہیں۔پنجاب اسمبلی کے حلقہ پی پی 205سے اکبر حیات ہراج اور پی پی 212سے اصغر حیات ہراج نے انتخابات میں فتح حاصل کی۔رضا حیات ہراج، اکبر حیات ہراج اور اصغر حیات ہراج نے قائد محمد نواز شریف پر مکمل اعتماد کا اظہار اور پارٹی میں شمولیت کا اعلان کیاہے۔

شہباز شریف نے رضا حیات ہراج، اکبر حیات ہراج اور اصغر حیات ہراج کا مسلم لیگ (ن)میں شمولیت کا خیرمقدم کرتے ہوئے شکریہ ادا کیا ہے۔اس موقع پر شہبازشریف نے کہاکہ آپ سب کا تعاون عوام کی مشکلات کے حل میں میں اہم ثابت ہوگا۔انہوںنے کہاکہ پاکستان کو معاشی خطرات سے بچانے اور قوم کو مزید بربادی سے بچانے کے ایجنڈے پر اتحادی حکومت بنا رہے ہیں۔ شہباز شریف نے کہاکہ قوم کا مینڈیٹ ہے کہ سب مل کر پاکستان کی بہتری کے لئے کام کریں۔ملاقات میں رضا حیات ہراج، اکبر حیات ہراج اور اصغر حیات ہراج نے وزیر اعظم نامزد ہونے پر پارٹی صدر شہباز شریف کو مبارک بھی دی ۔