اسلام آباد (این این آئی)اسلام آباد ہائی کورٹ نے بانی پی ٹی آئی اور بشری بی بی کی دورانِ عدت نکاح کیس خارج کرنے کی درخواست نمٹانے پر تحریری فیصلہ جاری کر دیا ہے۔تفصیلات کے مطابق اسلام آباد ہائی کورٹ کے چیف جسٹس عامر فاروق نے بانی پی ٹی آئی اور بشری بی بی کی دورانِ عدت نکاح کیس خارج کرنے کی درخواست نمٹانے پر 16صفحات پر مشتمل تحریری فیصلہ جاری کر دیا ہے۔

تحریری فیصلے میں اسلام آباد ہائی کورٹ نے دھوکے سے نکاح کے الزام میں جاری سمن کالعدم قرار دینے کی استدعا مسترد کر تے ہوئے کہا ہے کہ فراڈ سے نکاح کے الزام میں سمن جاری کرنے میں قانون کی خلاف ورزی نہیں پائی گئی، اسلام آباد ہائی کورٹ نے فیصلے میں حکم دیا ہے کہ دھوکہ دہی سے نکاح کی حد تک ملزمان ٹرائل کورٹ میں میرٹ پر کیس لڑیں۔فیصلے کے مطابق بانی پی ٹی آئی اور بشری بی بی کی درخواستیں جزوی طور پر منظور کی گئی ہیں، سپریم کورٹ کے فیصلوں کے مطابق فردِ جرم عائد ہونے کے بعد کیس خارج نہیں کیا جا سکتا۔