کراچی(این این آئی) پولیس سرجن ڈاکٹرسمیعہ کے 5 افراد کی ہلاکتوں کے واقعے پر دل دہلا دینے والے انکشافات سامنے آئے، بیوی اور بچوں کے سر میں گولیاں ماری گئیں۔تفصیلات کے مطابق کراچی میں ایئر پورٹ وائر لیس گیٹ کے قریب 5 افراد کی ہلاکتوں کے واقعے پر پولیس سرجن ڈاکٹرسمیعہ نے دل دہلا دینے والے انکشافات کئے۔پولیس سرجن ڈاکٹرسمیعہ نے کہا کہ جاں بحق خاتون کے سر پر گولی لگی، 6 سالہ جبرائیل کو سر اور دائیں بازو میں 2 گولیاں لگیں، 4 سالہ میکائیل کو سر اور بائیں ٹانگ پر 2 گولیاں لگیں، 2 سالہ ام ہانی کو سر پر گولی ماری گئی۔

ڈاکٹرسمیعہ نے کہا کہ چاروں افراد کی موت گولی لگنے سے واقع ہوئی، احسن نامی شخص کی موت گلا گھٹنے سے واقع ہوئی، جاں بحق افراد کے جسم کے مختلف اعضا کے نمونے لے لیے، نمونے فرانزک لیب بھجوائے گئے ہیں۔یاد رہے کراچی میں گزشتہ روز پیش آئے ایک واقعے سے سب کے دل ہلاکر رکھ دیے، بیروزگار شخص نے بیوی اور تین بچوں کو قتل کرکے خودکشی کرلی تھی۔بیوی بچوں اور اپنی زندگی ختم کرنے والے احسن رضا کا نوٹ بھی ملا ہے، جس میں اس نے لکھا تھا کہ میرے بچے، بیوی شہید ہیں، انہیں نہیں معلوم کہ میں کیا کرنے جارہا ہوں، لو یو آل۔احسن رضا نے اپنے الوداعی نوٹ میں والدین، رشتے داروں اور دوستوں سے معافی بھی مانگی ہے۔