راولپنڈی (این این آئی)سینٹرل جیل اڈیالہ میں قیدی کو زیادتی کے بعد قتل کر دیا گیا۔اطلاعات کے مطابق تھانہ صدر بیرونی پولیس نے چار قیدیوں کے خلاف مقدمہ درج کرلیا، مقدمہ قتل اور زیادتی کی دفعات کے تحت درج کیا گیا۔مقدمے کے متن کے مطابق مقتول سبیل کو وقاص، آصف، نقاش اور بلال نے ہاتھ پاؤں باندھ کر زیادتی کا نشانہ بنایا، زیادتی کے بعد مقتول کو گلے میں پھندہ ڈال کر قتل کر دیا گیا۔

مقتول کو اکتیس دسمبر اور یکم جنوری کی درمیانی شب سانس اکھڑنے پر دوائی بھی دی گئی تھی، یکم جنوری کی صبح مقتول بے ہوش پڑا تھا۔جیل ہسپتال منتقل کرنے پر اس کی موت کی تصدیق ہوئی، مقتول کے گلے پر نشان تھے جس سے موت مشکوک ہوئی۔ذرائع کے مطابق جیل میں مبینہ طور پر پیسے نہ دینے پر حوالاتیوں کو مختلف طریقے سے تنگ کیا جاتا ہے۔