کراچی(این این آئی)جمعیت علماء اسلام کے مرکزی رہنماء حافظ احمد علی نے کہا ہے کہ 2024فروری میں ہونے والے انتخابات میں پی ٹی آئی ،جے یو آئی میں ایک نشان پر انتخاب لڑنے کا معاہدہ ہو گیا، مشترکہ ملکر الیکشن لڑیںگے ،بلا نہ ملا تو دونوں جماعتوں کے امیدوار انگوٹھی کے نشان پر حصہ لیں گے،جمعیت علماء اسلام کے دس امیدواروں نے کاغذات نامزدگی جمع کروائیں ہیں، این اے 247اور پی ایس 122سے حافظ احمد علی این اے 230اور 231سے شاہ ولی اللہ نے اور این اے 220سے حافظ ارمان چوہان اور پی ایس 122اور 124سے دانش قادری پی ایس 123سے مفتی عابد نے پی ایس 113سے مولانا ریاض الحق نے کاغذات نامزدگی جمع کروائیں ہیں اور خواتین کی مخصوص نشتسوں پر بھی دو خواتین نے صوبائی اور قومی اسمبلی سے جمع کروائیں ہیں۔

یہ امیدوار جمعیت علماء اسلام رابطہ کے امیدوار ہیں اور پی ٹی آئی سے سیاسی اتحاد ہے اور پی ٹی آئی کے نشان سے الیکشن میں حصہ لینگے اور اگر کسی قانونی پیچیدگی کی وجہ سے اگر بلے کا نشان نا ملا تو دو نوں جماعتیں انگوٹھی کے نشان سے انتخابات میں حصہ لینگے یہ بات کور کمیٹی میں طے ہوچکی ہے۔ حافظ احمد علی نے نگران حکومت اور الیکشن کمیشن سے اپیل کی ہے کہ ہونے والے الیکشن میں شفافیت کا عمل لازمی قرار دے ایسے عمل سے گریز کیا جائے جس سے اس کی شفافیت پر انگلی اٹھے ملک کا سیاسی معاشی مستقبل شفاف الیکشن سے وابستہ ہے ۔