لاہور ( این این آئی) پنجاب فوڈ اتھارٹی نے دیسی گھی،چیز،کھویا، دہی، ڈیری پروڈکٹس میں ملاوٹ کرنے والوں کے خلاف خلاف شکنجہ سخت کر دیا ، ڈی جی فوڈ اتھارٹی کی ہدایت پر فوڈ سیفٹی ٹیموں نے صوبہ بھر میں 365 ڈیری یونٹس کی چیکنگ کے دوران ناقص پروڈکٹس کی موجودگی پر 4یونٹس بند،8مقدمات درج،70یونٹس کو بھاری جرمانے عائد اور 232 کو اصلاحی نوٹس جاری کر دیئے جبکہ 2ہزار 340کلو ملاوٹی دیسی گھی، کھویا، 410کلو ناقص دودھ،دہی، 350کلو سے زائد چیز اوردیگر ملاوٹی اشیا تلف کر دی گئیں ۔ ڈی جی فوڈ اتھارٹی عاصم جاوید نے بتایا کہ لاہور ڈویژن میں 44، فیصل آباد میں 64، ساہیوال میں 54، راولپنڈی میں 11، سرگودھا میں 64 ڈیری یونٹس کی چیکنگ کی گئی۔
گوجرانوالہ ڈویژن میں 53یونٹس، بہاولپور میں 20، ملتان ڈویژن میں 36، ڈی جی خان ڈویژن میں 29یونٹس کا معائنہ کیا گیا۔ پیور فوڈ ریگولیشنز کی سنگین خلاف ورزیوں پر سخت کارروائیاں عمل میں لائی گئیں، ملاوٹی کھوئے،دیسی گھی کی تیاری میں ممنوعہ مضر صحت اجزا کا استعمال کرنے پر یونٹس کو بند کیا گیا، انتہائی ناقص سٹوریج اور تیار پروڈکٹس پر فنگس لگی پائی گئی۔ ڈیری یونٹس سے ناقص اور ملاوٹی ڈیری پروڈکٹس برآمد ہونے پر 4یونٹ بند جبکہ 8کے خلاف مقدمات درج کروا دیئے گئے۔
عاصم جاوید نے بتایا کہ دیسی گھی اور کھوئے کے معیار کی تفصیلی جانچ کے لیے 58 سیمپل لیبارٹری بجھوائے گئے۔ انہوںنے کہا کہ غیر معیاری کھوئے اور دیسی گھی کو مختلف چھوٹی بڑی دکانوں پر سپلائی کیا جانا تھا،ملاوٹی دودھ اور کھوئے کا استعمال مختلف موذی امراض میں مبتلا کر سکتا ہے۔پنجاب بھر میں ملاوٹ کرنے والوں کیخلاف مسلسل کارروائیاں کی جارہی ہیں۔ فوڈ سیفٹی پر کوئی سمجھوتہ نہیں، ملاوٹ کرنے والوں کو کسی صورت رعایت نہیں دی جائے گی۔
