اسلام آباد (این این آئی) اسلام آباد میں قومی اسمبلی کے حلقے سے خواجہ سراء امیدوار نے کاغذاتِ نامزدگی جمع کرائے ہیں۔وفاقی دارالحکومت کے حلقے این اے 47 سے خواجہ سراء امیدوار نایاب علی نے کاغذاتِ نامزدگی جمع کرا دیے۔اسلام آباد سے ہی تحریکِ انصاف کے رہنما ظفر علی شاہ نے این اے 47 اور 48 کے لیے کاغذاتِ نامزدگی جمع کرائے۔دوسری جانب الیکشن کمیشن آف پاکستان نے 8 فروری 2024ء کو ہونے والے عام انتخابات کے لیے کاغذاتِ نامزدگی جمع کرانے کی تاریخ میں 2 روز کی توسیع کر دی۔

الیکشن کمیشن کے اعلامیے کے مطابق امیدوار اب کاغذاتِ نامزدگی 24 دسمبر تک جمع کرا سکتے ہیں۔اعلامیے میں کہا گیا کہ سیاسی جماعتیں مخصوص نشستوں کی ترجیحی فہرست بھی 24 دسمبر تک دے سکتی ہیں۔الیکشن کمیشن کے اعلامیے میں کہا گیا کہ کاغذاتِ نامزدگی کی جانچ پڑتال 25 سے 30 دسمبر تک کی جائے گی۔13 جنوری کو امیدواروں کو انتخابی نشانات الاٹ کیے جائیں گے،عام انتخابات کے لیے پولنگ 8 فروری کو ہو گی۔