لاہور (این این آئی)انسداد دہشت گردی عدالت نے ضمانتی کی جانب سے ذمہ داری نہ لینے پر چیئرمین تحریک انصاف عمران خان کے مچلکے منظور کرنے سے انکار کر دیا۔انسداد دہشت گردی عدالت لاہور میں چیئرمین تحریک انصاف عمران خان کے خلاف جناح ہاؤس حملہ کیس، عسکری ٹاور حملہ کیس کی سماعت ہوئی، جس میں عدالت نے عمران خان کے ضمانتی مچلکے منظور نہیں کیے۔

انسداد دہشت گردی عدالت کے جج اعجاز احمد بٹر کے روبرو عمران خان کا ضمانتی ان کا سوئپر شیروز پیش ہوا اور کہا کہ جو ضمانتی مچلکے عدالت نے طلب کیے ہیں وہ نقد رقم دینے کو تیار ہیں۔عدالت نے استفسار کیا کہ تم کیا کرتے ہو؟، جس پر ضمانتی شیروز نے جواب دیا کہ میں عمران خان کے گھر میں سوئپر ہوں۔ عدالت نے 3مقدمات میں لاکھ لاکھ روپے کا ضمانتی مچلکہ جمع کرانے کا حکم دیا تھا۔

جج نے کہا کہ میں کیسے یہ مچلکے منظور کر لوں۔کل کو عمران خان نہ آیا تو تم ذمے دار ہو گے۔ ضمانتی ذمے داری کے سوال پر سوئپر شیروز خاموش ہوگیا۔بعد ازاں عدالت نے ضمانتی کی ذمے داری نہ لینے پر عمران خان کے ضمانتی مچلکے منظور نہیں کیے۔واضح رہے کہ عمران خان کا ضمانتی سوئپر مقدمہ نمبر23 /1271گلبرگ، 96/23سرور روڈاور 768/23تھانہ شادمان میں درج مقدمے میں ضمانتی مچلکے جمع کرانے آیا تھا۔

موضوعات:سوئپر