لاہور(مانیٹرنگ+ این این آئی) وزیر اعظم عمران خان سے معاون خصوصی برائے اطلاعات پنجاب ڈاکٹر فردوس عاشق اعوان نے لاہور میں ملاقات کی۔ملاقات میں وزیراعلی پنجاب سردار عثمان بزدار بھی موجود تھے۔ فردوس عاشق اعوان نے وزیراعظم عمران خان کو اسسٹنٹ کمشنر سونیا صدف کے غیر پیشہ ورانہ رویہ کی شکایت لگا دی، وزیراعظم عمران خان کو ابتدائی تحقیقاتی رپورٹ بھی پیش کر دی، ڈاکٹر فردوس عاشق اعوان نے وزیر اعظم عمران خان کو صوبے میں جاری عوامی منصوبوں اور رمضان
سہولت بازاروں کی کارکردگی کے حوالے سے آگاہ کیا۔ڈاکٹر فردوس عاشق اعوان نے رمضان بازاروں میں اشیائے خورونوش کی فراہمی اور عوام کو درپیش مسائل سے بھی وزیراعظم کو آگاہ کیا۔ ویراعظم عمران خان نے اس موقع پر عوامی مسائل کے حل کیلئے ہدایات جاری کیں۔وزیراعظم نے ہدایت کی عوام کو زیادہ سے زیادہ ریلیف فراہم کرنے کیلئے موثر اقدامات کیے جائیں اور عوام کی خدمت میں کوئی کسر اٹھا نہ رکھی جائے۔وزیر اعظم نے اشیا کی قیمتوں کی سخت نگرانی کی بھی ہدایت کی۔
