حیدر آباد،بورے والا ( آن لائن )حیدر آباد سے کراچی جاتے ہوئے ایم نائن موٹروے پر بارات کی گاڑی کو حادثہ پیش آیا جس کے نتیجے میں دلہا جاں بحق ہوگیا۔پولیس کے مطابق افسوسناک واقعہ نوری آباد کے قریب دلہے کی کار ٹرک سے جاٹکرائی۔حادثے کے نتیجے میں دلہا جاں بحق ہوگیا جس کی شناخت جنید قاضی کے نام سے ہوئی۔حادثے میں تین باراتی
دانش، دانیال اور ماجد شدید زخمی ہوگئے۔ زخمیوں کو قریبی طبی امداد کے مرکز منتقل کر دیا گیا ہے۔پولیس کا کہنا ہے کہ متوفی حیدرآباد کے علاقے چھوٹکی گٹی کا رہائشی ہے جو بارات کے ہمراہ کراچی جارہا تھا جب کہ حادثے کے بعد ٹرک ڈرائیور فرار ہوگیا۔دوسری جانب بورے والا میں کار تیز رفتاری کی باعث ٹرک کے نیچے جا گھسی جس کے باعث ایک ہی خاندان کے 8 افراد موقع پر جاں بحق ہو گئے۔واقعہ لڈن روڈ پر نواحی گائوں 463 ای بی کے قریب پیش آیا۔ جاں بحق افراد میں 2 مرد، 3 خواتین اور 3 بچے شامل ہیں۔جاں بحق افراد کی لاشوں کو تحصیل ہیڈ کوارٹر اسپتال منتقل کر دیا گیا ہے۔ ریسکیو ٹیموں نے کار اور ٹرک کی باڈیز کاٹ کر مسافروں کی پھنسی ہوئی لاشوں کو نکالا۔مقامی پولیس نے حادثے کی تحقیقات شروع کر دی ہیں، کار میں سوار تمام افراد کا تعلق ایک ہی خاندان سے ہے جو کہ لڈن سے لاہور جا رہے تھے۔جاں بحق ہونے والوں کی شناخت کار ڈرائیور محمد جہانگیر ولد فیاض احمد موضع علی الدین لڈن، شہریار، مہوش زوجہ محمد عمران، احمد ولد جہانگیر عمر 4 سال، علی ولد جہانگیر عمر 7 ماہ، ماریہ دختر جہانگیر عمر 6 سال، سوہا اور بلو کے ناموں سے ہوئی ہے۔
