کراچی(این این آئی)وفاقی وزیربرائے انفارمیشن اینڈ ٹیکنالوجی سید امین الحق نے کہا ہے کہ ای ووٹنگ سسٹم کو آئندہ انتخابات میں متعارف کرایاجائیگا اوراس پر تیزی سے کام جاری ہے، آزاد کشمیر میں 12 جولائی کو ہونے والے انتخابات میں ای ووٹنگ متعارف کروانا چاہتے ہیں تاہم ایسا ممکن نظر نہیں آرہا ہے۔ قانونی معاملات کی وجہ سے مسائل درپیش ہیں،وزیراعظم کے ساتھ ایم کیوایم کے

وفد کی ملاقات میں تمام وفاقی وزرا موجود تھے۔ ایم کیو ایم نے وزیراعظم کے سامنے تمام تفصیلات رکھیں۔ان خیالات کا اظہار انہوں نے خصوصی گفتگوکرتے ہوئے کیا، وفاقی وزیر نے کہاکہ دنیا میں ٹیکنالوجی کی میدان میں تبدیلی آرہی ہے،یورپ اور امریکا بہت آگے نکل چکا ہے، ڈیجیٹل پاکستان وزیراعظم کا مشن ہے۔وزیراعظم کی خواہش تھی کہ اوورسیز پاکستانیوں کیلیے ای ووٹنگ متعارف کروائی جائے۔امین الحق نے بتایا کہ الیکشن کمیشن آف پاکستان ای ووٹنگ کو دیکھ رہی ہے۔آزادانہ ، شفاف اور منصفانہ انتخابات کروانے کی ذمہ داری الیکشن کمیشن کی ہے۔وزارت آئی ٹی کا کام شفاف انتخابات میں تیکنیکی معاونت فراہم کرناہے۔فائیو جی ٹیکنالوجی سے متعلق انہوں نے کہا کہ اگلے سال دسمبرتک فائیو جی پاکستان میں لائونچ ہوجائیگا۔ پاکستان کا انفرااسٹریکچر اس قابل نہیں تھا اور اس کو اپ ڈیٹ کیا جارہا ہے۔ انھوں نے یہ بھی بتایا کہ جب تک فور جی کا دائرہ وسیع نہیں ہوگا، فائیو جی کو متعارف کروانے میں مشکلات درپیش رہیں گی۔ ہر ماہ 14 لاکھ صارفین کو فور جی کی سہولت دے رہے ہیں۔انہوں نے کہا کہ سینیٹ انتخابات میں ایم کیو ایم پاکستان وفاقی حکومت اور تحریک انصاف کے ساتھ کھڑی رہی۔ قومی اسمبلی سمیت چئیرمین سینیٹ اور ڈپٹی چئیرمین سینیٹ کیلیے ایم کیوایم نے پی ٹی آئی کو ووٹ کیا۔انہوں نے کہاکہ وزیراعظم کے ساتھ ایم کیوایم کے وفد کی ملاقات میں تمام وفاقی وزرا موجود تھے۔ ایم کیو ایم نے وزیراعظم کے سامنے تمام تفصیلات رکھیں۔ وفاقی حکومت کی ذمہ داری بنتی ہے کہ شہری سندھ کے ساتھ انصاف کیا جائے۔امین الحق نے بتایا کہ حکومت کو کہا ہے کہ سندھ کے لیے ترقیاتی فنڈ کی رفتار کو تیز کیا جائے۔ حیدرآباد یونی ورسٹی کے معاملات کو تیز کیا جائے یا کوئی متبادل رکھا جائے۔ اس حوالے سے وزیراعظم نے فوری طور پر حکم جاری کیاہے۔ اس کے علاوہ ایم کیوایم کے سیکٹر آفسز سمیت لاپتہ کارکنوں کے معاملات پروزیراعظم نے ہدایت دی کہ میرٹ پر اس معاملے کو دیکھا جائے اور کوئی حل نکالا جائے۔