اسلام آباد (این این آئی) پاکستان تحریک انصاف کے سینیٹر فیصل جاوید نے کہا ہے کہ وزیر اعظم کے نیا پاکستان ہاؤسنگ پروگرام کے تحت جمعرات سے گھروں کی فراہمی شروع ہورہی ہے، اب آپ کا اپنا مکان ہوگا، یہ ہی ہے نیا پاکستان۔سینیٹر فیصل جاوید نے سماجی رابطے کی ویب سائٹ ٹوئٹر پر اپنے پیغام میں کہا کہ خوابوں کی تعبیر اور گھروں کی تقسیم مبارک ہو۔فیصل جاوید نے کہا کہ وزیر اعظم کے نیاپاکستان ہاؤسنگ پروگرام کے تحت جمعرات سے گھروں کی فراہمی شروع ہورہی ہے، اب آپ کا اپنا مکان ہوگا، یہ ہی ہے نیا پاکستان، عوام

کیلئے احساس قوم کی تقدیر بدل دیتا ہے۔خیال رہے گیارہ سال بعد اسلام آباد کے مزدور اور دیہاڑی دار طبقے کو گھروں کی فراہمی کا منصوبہ مکمل ہوگیا، وزیراعظم جمعرات کو ورکرز ویلفیئر فنڈ کے تحت رہائشی فلیٹس اورمکانات کی تقسیم کریں گے۔معاون خصوصی زلفی بخاری نے 11سال سے زیرالتوارہائشی پراجیکٹ مکمل کرانے میں اہم کردار ادا کیا، نیا پاکستان ہاؤسنگ منصوبے کے تحت 1000سے زائد فلیٹس اور 500 مکانات تیار کئے گئے ہیں۔وزیراعظم عمران خان مزدورطبقے کیلئے مزید 1500 فلیٹس کا سنگ بنیاد رکھیں گے۔