گوجرانوالہ(آن لائن)پنجاب کے شہر گوجرانوالہ میں نجی کالج کے لڑکوں کی گرلز کالج کے باہر فائرنگ کی ویڈیو سوشل میڈیا پر وائرل ہو گئی ہے ۔ میڈیا رپورٹس کے مطابق سوشل میڈیا پر وائرل ہونے والی ویڈیو میں دیکھا جا سکتا ہے کہ درجنوں موٹرسائیکلز پر سوار طلبا ،
جن کا تعلق ایک نجی کالج سے تھا ، نے گرلز کالج کے باہر ہلڑبازی مچائی اور پھر فائرنگ کردی ۔بتایا گیا ہے کہ تھانہ سول لائنز کے علاقے میں ضیا الحق روڈ پر نجی کالج کے طلبا نے الوداعی تقریب کے بعد گرلز کالج کے باہر ہلڑ بازی کی اور خودکار اسلحے سے فائرنگ کی۔ کچھ نوجوانوں نے گرلز کالج کے اندر گھسنے کی کوشش کی جس پر گرلز کالج کے گارڈز نے ہوائی فائرنگ کی ، گارڈز کی فائرنگ کے باعث طلبا وہاں سے فرار ہو گئے ۔ پولیس کا اس حوالے سے کہنا ہے کہ ان کو اس واقعے کا علم نہیں ہے اور نہ ہی کسی کی جانب سے اس حوالے سے کوئی درخواست جمع کروائی گئی ہے۔
