اسلام آباد (این این آئی)گجرات شہر کے 17 علاقوں میں لاک ڈاؤن لگانے کا عندیہ ۔ڈپٹی کمشنر گجرات سیف انور نے کہا ہے کہ گجرات میں کورونا کی تیسری لہر سے نمٹنے کے لیے تیاریاں مکمل کر لی ہیں اور آج سے تمام مارکیٹوں کو شام 6 بجے بند کر دیا جائے گا۔

این سی او سی کی جانب سے گجرات شہر میں 15مارچ سے دو ہفتے کیلئے تعلیمی ادارے بند کرنے کا اعلان کیا گیا ہے۔گجرات میں کورونا کیلئے مختص عزیز بھٹی شہید ہسپتال کا وارڈ مریضوں سے بھر گیا ، اضافی فیلڈ ہسپتال قائم کردیا گیا ، ایک دیہات میں اسمارٹ لاک ڈائون اوردواسکول بھی سیل کردیئے گئے۔ضلع گجرات کے عزیز بھٹی شہید ٹیچنگ ہسپتال کے کورونا وارڈ میں 60 بستروں کی گنجائش تھی، ہسپتال بھر جانے پر اسکی گنجائش 120بستروں تک بڑھا دی گئی ہے۔گجرات میں کورونا مریضوں کی تعداد 75تک جاپہنچی ،فعال کیسز کی تعداد2500 سے بھی تجاوز کر چکی ہے۔این سی او سی کی جانب سے گجرات شہر میں بھی 15مارچ سے دو ہفتے کے لئے تعلیمی ادارے بند کرنے کا اعلان کیا گیا ہے۔ڈپٹی کمشنر سیف انور چیمہ نے بتایا کہ گجرات میں شہری اکثر بیرون ملک سفر کرتے ہیں، سفر کے لئے لازمی ٹیسٹ کی صورت میں کورونا وائرس کی تشخیص ہوجاتی ہے، شہریوں کو ایس اوپیز کا خیال رکھتے ہوئے زیادہ احتیاط کرنی چاہیے۔گجرات میں اب تک ایک ڈاکٹر سمیت 80 افراد کورونا وائرس سے لقمہ اجل بن چکے ہیں، تیسری لہر میں کورونا ایس او پیز پر سختی سے عمل درآمد نہیں کیا گیا تومتاثرہ مریضوں کی تعداد اور بھی بڑھ سکتی ہے۔ ‎