لاہور(این این آئی) لاہور سیالکوٹ موٹروے کیس کی سماعت کے دوران متاثرہ خاتون نے انسداد دہشت گردی کی خصوصی عدالت میں اپنا بیان قلمبند کروا دیا، عدالت میں متاثرہ خاتون کے تین کمسن بچوں کو بھی پیش کیا گیا، عدالت نے بچوں کے کم عمر ہونے پر بیان ریکارڈ نہ کرنے کا حکم دیا۔انسداد دہشت گردی کی خصوصی عدالت کے جج ارشد حسین بھٹہ نے جیل میں سماعت کی۔ دوران سماعت متاثرہ خاتون نے
مکمل واقعے سے متعلق اپنا بیان ریکارڈ کروایا، خاتون نے کمرہ عدالت میں ملزم عابد ملہی، شفقت عرف بگا کی شناخت کی، متاثرہ خاتون نے ملزمان کی شناخت جیل میں جاکر بھی کی۔دوسری جانب عدالت نے انسپکٹر محمد سلیم کا بیان بھی قلمبند کرلیا، ملزمان عابد ملہی اور شفقت بگا کا ڈی این اے لینے والے کا بھی بیان ریکارڈ کیا گیا۔سپیشل پراسیکیوٹر عابد بھٹی، حافظ اصغر، عبدالجبار نے بیانات ریکارڈ کرائے۔
