اسلام آباد(این این آئی)حکمران جماعت پاکستان تحریک انصاف کی ایک اور رکن اسمبلی ملیحہ علی اصغر نے سینیٹ الیکشن میں نظر انداز کرنے کا شکوہ کیا ہے ۔پی ٹی آئی کی رکن خیبرپختونخوا اسمبلی ملیحہ علی اصغر کے مطابق سینیٹ انتخابات میں ہزارہ ریجن کو یکسر نظر انداز کیا گیا۔

انہوں نے کہا کہ سینیٹ نشستوں کا تناسب دیکھا جائے تو ہزارہ ریجن کو 3 نشستیں ملتیں، پارٹی کے تمام فیصلے پشاور سے کیے جا رہے ہیں۔انہوں نے کہا کہ گزشتہ دنوں پشاور میں وزیراعظم عمران خان کی سربراہی میں ہونے والے اجلاس میں شرکت نہ کرکیوزیراعظم کو اپنا احتجاج ریکارڈکرایا۔دوسری جانب پی ٹی آئی سینئر رہنما لیاقت جتوئی کو پارٹی قیادت پر سنگین الزامات عائد کرنے پر نوٹس جاری ۔ تفصیلات کے مطابق قائمہ کمیٹی برائے نظم و احتساب نے اظہاروجوہ کا نوٹس جاری کردیا ۔ لیاقت جتوئی کا کہناہے کہ بیشک کورٹ کا نوٹس بھیجیں میں بتاؤں گا کہ سینیٹ کا ٹکٹ کیسے دیا گیاہے۔پی ٹی آئی رہنما سے نوٹس میں متنازع بیان پر وضاحت طلب کی گئی ہے ۔تحریک انصاف کے رہنما لیاقت جتوئی کو پارٹی قیادت کے خلاف گفتگو اور سنگین الزام تراشی کی ، ان کا طرز عمل پارٹی پالیسی اور آئین کی سریح خلاف ورزی ہے ، مغربی سندھ ریجن کی قائمہ کمیٹی سات روز معاملے پر کارروائی کرے گی ۔