لاہور (این این آئی )سینیٹ انتخابات، وزیراعلی عثمان بزدار نے صوبائی وزرا ء اور معاونین کے لاہور سے باہر جانے پر پابندی لگا دی۔ سینٹ انتخابات کے باعث وزیراعلی پنجاب نے وزرا اور معاونین کے باہر جانے پر پابندی سینیٹ انتخابات تک کے لیے عائد کی ہے۔ وزیراعلی پنجاب نے ارکین اسمبلی سے رابطوں کے وزرا کے گروپس تشکیل دے دئیے ہیں۔ ہر وزیر کے تحت گروپ اراکین اسمبلی اپنے
امیدوار کیلئے مہم چلائی گے کوئی بھی وزیر معاون یا گروپ ممبر وزیراعلی سے اجازت کے بغیر لاہور سے باہر نہیں جا سکتے۔ دوسری جانب وزیر اعلی پنجاب سردار عثمان بزدار کی زیر صدارت صوبائی وزراء ، مشیران اور معاونین خصوصی کا اہم اجلاس منعقد ہوا جس میں سینیٹ الیکشن کے حوالے سے تفصیلی مشاورت کی گئی- اجلاس میں سینیٹ الیکشن میں پاکستان تحریک انصاف اور مسلم لیگ ق کے امیدواروں کو کامیاب کرانے کے لئے حکمت عملی کا جائزہ لیا گیا -صوبائی وزراء ، مشیران اور معاونین خصوصی نے سینیٹ الیکشن کے حوالے سے تجاویز دیں -وزیر اعلی عثمان بزدار نے اجلاس سے خطاب کرتے ہوئے کہا کہ سینیٹ الیکشن میں حکومتی اتحاد کے امیدوار وں کو کامیاب کرانے کے لئے صوبائی وزراء اور اراکین اسمبلی کے گروپ تشکیل دے دیئے گئے ہیں -گروپس اپنے متعلقہ امیدوار کے ساتھ مسلسل رابطے میں رہیں گے – آپس میں بہترین کوآرڈینیشن کے بہترین نتائج سامنے آئیں گے -انہوں نے کہا کہ میں خود بھی تمام گروپس اور امیدواروں کے ساتھ رابطہ رکھوں گا اور جلد پارلیمانی پارٹی کا اجلاس بلایا جائے گا-انہوں نے کہا کہ سینیٹ الیکشن میں تحریک انصاف اکثریتی پارٹی بن کر سامنے آئے گی-اپوزیشن کو ہر محاذ پر شکست دی ہے اور آئندہ بھی دیں گے – اپوزیشن کا بیانیہ پٹ چکا ہے اور عوامی خدمت کے سامنے منفی سیاست کی کوئی وقعت نہیں –
