اسلام آباد (این این آئی)سابق وزیراعظم نواز شریف کی صاحبزادی مریم نواز نے سینیٹ الیکشن اور لانگ مارچ کے حوالے سے ایک ہفتے کیلئے اسلام آباد میں ڈیرہ ڈالنے کا فیصلہ کرلیا۔مریم نواز 26 فروری تا 3 مارچ اسلام آباد میں قیام کریں گی اور اس دوران سینیٹ الیکشن کو مانیٹر اور لانگ مارچ کی تیاریوں کے حوالے سے پارٹی کی ہر
سطح کی قیادت سے مشاورت کریں گی۔اس موقع پر اپوزیشن کی سب سے بڑی جماعت مسلم لیگ (ن) نے مرکزی جنرل کونسل کا اجلاس 27 فروری کو اسلام آباد میں طلب کیا ہے۔ن لیگ کی مرکزی جنرل کونسل کے اجلاس میں ارکان پارلیمان، پارٹی عہدیداران اور تقریباً ایک ہزار ارکان شریک ہوں گے۔اجلاس میں پارٹی کی اعلیٰ قیادت اور نچلی سطح تک کے ارکان سے سینیٹ الیکشن اور لانگ مارچ سے متعلق حکمت عملی کے بارے میں مشاورت کی جائے گی۔ن لیگی مرکزی جنرل کونسل کے اجلاس میں لانگ مارچ اور سینیٹ الیکشن کے بارے میں پارٹی کی حکمت عملی زیر بحث رہے گی اور ہر سطح کی قیادت سے رائے اور تجاویز طلب کی جائیں گی۔اجلاس میں لانگ مارچ اور دھرنے کے انتظامات کی ذمے داریاں پارٹی عہدیداران اور ارکان پارلیمنٹ کو سونپی جائیں گی۔کونسل اجلاس میں ن لیگی کی ذیلی تنظمیوں کے عہدیداران اور صوبائی تنظیموں کے ذمے داران بھی شامل ہوں گے، اس موقع پر لانگ مارچ کیلئے فنڈنگ، ٹرانسپورٹ، دھرنا کی صورت میں قیام و طعام سے متعلق مشاورت ہوگی۔اجلاس میں فنڈنگ کیلئے مرکزی اور صوبائی تنظیموں، ارکان پارلیمنٹ ٹکٹ ہولڈرز کو ذمہ داری سونپی جائے گی۔سینیٹ الیکشن کی سرگرمیاں مانیٹر کرنے کے لیے مریم نواز 26 فروری سے 3 مارچ تک اسلام آباد میں ہوں گی، ایک
ہفتہ کے دوران لانگ مارچ اور سینیٹ الیکشن کے حوالے سے روزانہ کی بنیاد پر میٹنگز ہوں گی۔مریم نواز سینیٹ الیکشن کے حوالے سے اپنے اراکین اسمبلی پر کڑی نظر رکھیں گی اور مشکوک ارکان اسمبلی کو خاص طور پر مانیٹر کیا جائے گا۔مریم نواز پارٹی کی سینئر قیادت سمیت پی ڈی ایم رہنماؤں کے ساتھ بھی ملاقات کریں گی۔یوسف رضا گیلانی سینیٹ الیکشن کے حوالے سے مریم نواز سے اسلام آباد میں ملاقات کریں گے۔
