اسلام آباد ( آن لائن )پاکستان پیپلزپارٹی نے سینیٹ انتخابات کے لیے امیدواروں کے نام فائنل کرلیے، جبکہ پاکستان پیپلز پارٹی کے رہنما یوسف رضا گیلانی نے سینیٹ انتخاب نہ لڑنے کا فیصلہ کر لیا۔ تفصیلات کے مطابق پی پی پی کے پارلیمانی بورڈ نے سینیٹ انتخابات کے لیے امیدواروں کے ناموں کو حتمی شکل دے دی ، جن میں شیری رحمان، سلیم مانڈوی والا شامل ہیں جب کہ ٹیکنوکریٹ کی

مخصوص نشست پر ڈاکٹر کریم خواجہ اور خواتین کی نشست پر پلوشہ خان اور خیرونساء مغل کو امیدوار نامزد کرنے کا فیصلہ کیاگیا ہے ۔پیپلز پارٹی نے پنجاب میں عظیم الحق منہاس کو ٹکٹ جاری کر دیا گیا ۔پیپلز پارٹی نے خیبر پختونخواہ میں فرحت اللہ بابر کو ٹکٹ جاری کر دیا۔بتایا گیا ہے کہ اگلے ماہ 3مارچ کو ہونے والے سینیٹ الیکشن کے لیے امیدواروں کے ناموں کی منظوری سابق صدر آصف علی زرداری اور پیپلزپارٹی کے چیئرمین بلاول بھٹو زرداری نے دی ، جس کے بعد جنرل نشست کے لیے جام مہتاب ڈاہر اور تاج حیدر بھی سینیٹ انتخابات میں پاکستان پیپلزپارٹی کے امیدوار ہوں گے۔اس کے علاوہ سینیٹ انتخابات تک پاکستان پیپلزپارٹی کے ارکان سندھ اسمبلی کے کراچی چھوڑنے پر پابندی عائد کردی گئی ، میڈیا ذرائع کے مطابق پیپلزپارٹی کے ارکان سندھ اسمبلی کے کراچی چھوڑنے پر پابندی عائد کردی گئی ہے ، اور اس ضمن میں پاکستان پیپلزپارٹی کی اعلی قیادت کی ہدایت پر اراکین سندھ اسمبلی کو کراچی میں قیام کرنے کی ہدایت کی گئی ہے۔ دوسری جانب پاکستان پیپلز پارٹی کے رہنما اور سابق وزیراعظم یوسف رضا گیلانی نے سینیٹ انتخابات میں حصہ نہ لینے کا فیصلہ کر لیا ہے۔ ذرائع کے مطابق بعض پارٹی رہنماں کی جانب سے یوسف رضا گیلانی کو سینیٹ انتخاب میں حصہ لینے پر آمادہ کرنے کی کوشش کی جا رہی ہے لیکن یوسف رضا گیلانی نے پارٹی کو اپنے فیصلے سے آگاہ کر دیا ہے ، البتہ اس فیصلے کی کوئی وجہ تاحال سامنے نہیں آ سکی۔خیال رہے کہ سابق وزیراعظم یوسف رضا گیلانی کو چئیرمین سینیٹ بنائے جانے کی خبریں گذشتہ کچھ روز سے گردش کر رہی تھیں اور کہا جا رہا تھا کہ پیپلز پارٹی سینیٹ انتخابات میں متوقع نشستیں حاصل کرنے کے بعد چئیرمین سینیٹ کے لیے یوسف رضا گیلانی کا نام دے گی۔لیکن پارٹی سینئیر رہنما یوسف رضا گیلانی نے سینیٹ انتخابات میں حصہ نہ لینے کا فیصلہ کر لیا ہے۔یوسف رضا گیلانی کے اس فیصلے پر پاکستان پیپلز پارٹی کی جانب سے تاحال کوئی موقف سامنے نہیں آیا

۔یہاں واضح رہے کہ پاکستان میں سینیٹ انتخابات کا شیڈول جاری کر دیا گیا ، الیکشن کمیشن آف پاکستان کی جانب سے جاری بیان میں کہا گیا کہ ملک میں سینیٹ الیکشن 3 مارچ کو ہوں گے ، الیکشن کمیشن کے بیان کے مطابق سینیٹ الیکشن کے لیے پولنگ 3 مارچ کو ہو گی ، الیکشن کمیشن نے سینیٹ انتخابات کے لیے شیڈول جاری کرتے ہوئے بتایا کہ سینیٹ الیکشن کے لیے کاغذات نامزدگی 12 سے 13 فروری تک جمع کروائے جا سکیں گے ، نامزد امیدواروں کے نام 14 فروری کو لگائے جائیں گے جس کے بعد سینیٹ انتخابات کے لیے امیدواروں کی جانب سے جمع کروائے جانے والے کاغذات نامزدگی کی جانچ پڑتال 15 اور 16 فروری کو ہوگی۔