لاہور(این این آئی)مسلم لیگ (ن) کے صدر شہباز شریف کی اہلیہ نصرت شہباز کو اشتہاری قرار دینے کیخلاف درخواست پر نیب نے لاہور ہائیکورٹ میں تحریری جواب جمع کرادیا ۔ نیب نے نصرت شہباز کی درخواست کی مخالفت کرتے ہوئے موقف اپنایا کہ منی لانڈرنگ کیس میں احتساب عدالت کے طلب کرنے کے

باوجود نصرت شہباز پیش نہیں ہوئیں، احتساب عدالت نے قانون کے مطابق نصرت شہباز کے وارنٹ جاری کرنے کے بعد اشتہاری قرار دیا ، نصرت شہباز شہباز شریف خاندان کے خلاف ریفرنس میں نامزد ہیں ، نصرت شہباز نے منی لانڈرنگ میں اہم کردار ادا کیا ان کے نام کروڑوں روپے کی پراپرٹی ہے ۔ استدعا ہے لاہور ہائیکورٹ نصرت شہباز کی اشتہاری قرار دئیے جانے کیخلاف درخواست مسترد کرے۔ نصرت شہباز نے اشتہاری قرار دئیے جانے کا احتساب عدالت کا فیصلہ چیلنج کر رکھا ہے۔دوسری جانب مسلم لیگ (ن) کے صدر شہبازشریف سے ان کے اہل خانہ نے کوٹ لکھپت جیل میں ملاقات کی ۔ بتایا گیا ہے کہ شہبازشریف کی ہمشیرہ ،صاحبزادی اور حمزہ شہباز کی اہلیہ نے شہباز شریف سے ملاقات کر کے ان کی صحت کے حوالے سے دریافت کیا۔اہل خانہ نے شہبازشریف کو لندن میں ہتک عزت مقدمے کی کارروائی کے حوالے سے بھی آگاہ کیا ۔یاد رہے کہ شہباز شریف کو دو روز قبل نجی ہسپتال منتقل کر کے مختلف ٹیسٹ لئے گئے تھے۔  شہباز شریف کی اہلیہ نصرت شہباز کو اشتہاری قرار دینے کیخلاف درخواست پر نیب نے لاہور ہائیکورٹ میں تحریری جواب جمع کرادیا ۔

موضوعات:نصرت شہباز