اسلام آباد (آن لائن، این این آئی ) وزیرِاعظم عمران خان کیخلاف تحریکِ عدم اعتماد پر پیپلز پارٹی نے حکمت عملی بنا لی۔ پی ڈی ایم کے 4 فروری کو ہونے والے سربراہی اجلاس تمام جماعتوں کو اعتماد میں لیں گے ۔ ذرائع نے بتایا کہ پیپلز پارٹی ان ہائوس تبدیلی سے متعلق اجلاس میں

تجاویز پیش کرے گی۔ چیئرمین بلاول بھٹو زرداری ان ہاوس تبدیلی سے متعلق قائدین کو اعتماد میں لیں گے۔ اجلاس میں لانگ مارچ، ریلیوں اور سینیٹ انتخابات پر مشاورت ہو گی۔دوسری جانب سیکرٹری جنرل پیپلز پارٹی سید نیر حسین بخاری نے کہاہے کہ چیئرمین بلاول بھٹو کی تحریک عدم اعتماد تجویز سے وزیراعظم ہاؤس میں بھونچال آگیا ہے۔ اپنے بیان میں نیرحسین بخاری نے کہاکہ پیپلزپارٹی کی تجویز کے بعد وزیراعظم کو پارٹی ارکان اور اتحادیوں کی یاد آگئی ہے۔ انہوںنے کہاکہ وزیراعظم کا پارلیمنٹ ہائوس آکر پارلیمانی پارٹی اجلاس کی صدارت کرنا ثابت کرتا ہے کہ پی ڈی ایم کی تحریک کامیابی کی طرف گامزن ہے۔ انہوںنے کہاکہ سرکاری جماعت کے اندر سے خلفشار عیاں ہو رہا ہے،صدر آصف زرداری نے پہلے ہی کہہ دیا تھا ، یہ خود اپنے وزن سے گریں گے ۔ انہوںنے کہاکہ عمران خان پی ڈی ایم کی تحریک عدم اعتماد سے قبل ہی ”اپنوں” کا اعتماد کھو رہے ہیں ۔ نیئر حسین بخاری نے کہاکہ نکالے جانے سے بہتر ہے کہ عمران خان خود مستعفی ہو جائیں ۔انہوںنے کہاکہ اشیاء ضروریہ سستی کرنے کی بجائے ترقیاتی منصوبوں کے نام پر ادبوں روپے کی پیشکش سیاسی رشوت کے مترادف ہے